அய்கிரி நந்தினி மெட்டு-----------ஐயப்பன் பாடல்

 

#அய்கிரி_நந்தினி_மெட்டு
#ஐயப்பன்_பாடல்
#இன்று_பிறந்தது

ஹரிஹர சங்கமச் சத்திய புத்திர
சக்தி சொரூபனே வந்திடய்யா...
கலியுக இன்னலைத் தட்டிட வெட்டிட
இன்பம் நிறைத்திட வந்திடய்யா..

இறையரு ளே இனியெங்கும் ததும்பிட
நீயும்வரப் பிணி ஓடுமய்யா..
ஹரி ஹர னே சிவமாதவ மைந்தனே
கர்மக் கொடும்பிணி ஓட்டிடய்யா

இனிதுற எங்கிலும் நல்லறம் ஓங்கிட
பந்தள மாமணி வந்திடய்யா...
கனிவுடன் எங்களைக் காக்கிற வேந்தனே
உன்முகம் காட்டிட வந்திடய்யா...
................இறையருளே

பரவிடும் வன்துயர் பற்றினை நீக்கிட
எம்குல தெய்வமே வந்திடய்யா..
பரிவுடன் பல்லுயிர் காக்கிற மன்னனே
ஐங்கரன் தம்பியே வந்திடய்யா..
................இறையருளே

கொக்கரக் கோவென கூவிடும் சேவலைத்
தன்கொடி தாங்கியோன் சோதரனே
கொக்கறு கோமகன் கந்தனைப் போலவே
செந்தமிழ் பாடிட வாருமய்யா
................இறையருளே

கொட்டிட கொட்டிட ஜண்டைகள் கொட்டிட
கேரளம் ஆள்கிற ஆண்டவனே..
பட்டென சட்டென படபட வேயென
பாரினை ஆண்டிட வாருமய்யா‌..
................இறையருளே

செ..இராசா