இடைவெளி(யே) இல்லை -- காமத்துப்பால் 18+&- வள்ளுவர் திங்கள் 174

 #இடைவெளி(யே)_இல்லை
#காமத்துப்பால்_18+&-
#ஒரே_எதுகையில்_குறள்_வெண்பாக்கள்


இடைவெளி இல்லா இதயப் பயணம்
இடையிலே நின்றால் இடர்
(1)

நடையினை மாற்றி நதியென ஓடும்
கடைசித் துளியே கவி
(2)

தடைகளைத் தாண்டி தழுவிட எண்ணி
உடைகளைத் தாண்டும் உளம்
(3)

கிடைக்கா பொழுதில் கிடைத்திட ஏங்கிக்
கிடைத்தபின் பற்றும் கிறுக்கு
(4)

அடையும் வரைக்கும் அடங்கா தவிப்பை
அடைந்தும் அடங்கா(து) அகம்
(5)

கடைசி வரைக்கும் கரைகாணா காமம்
விடையின்றித் தேடும் வினா
(6)

இடைஇடை கொள்ளும் இளமையின் ஊடல்
இடைஇடை கூடலின் ஈர்ப்பு
(7)

எடைமேல் எடையேற்றி இடையூரும் போதும்
இடையூறாய் இல்லை எடை
(8.)

குடைக்குள் மழையென கொட்டிடும் காமம்
அடைமழை ஆகும் அடை
(9)

கொடைபோல் பெருகும் கொடுக்கையில் இன்பம்
கடைவரை அன்பைக் கொடு
(10)

செ. இராசா

#வள்ளுவர்_திங்கள்_174