#தலைப்பு_பண்பிலார்............வள்ளுவர்_திங்கள்_120

#இலக்கியச்_சான்றுகள்_மூன்று

பண்பில்லா கௌரவர்கள் பாரதப்போர் கொண்டுவந்து
மண்ணிற்குள் போனார் மறைந்து
(1)

பண்பில்லா சூர்ப்பனகை பாசாங்கு செய்ததினால்
அண்ணனும் சாய்ந்தார் அறி
(2)

பண்பில்லா கோவலர்கள் பாடியாடச் சென்றதினால்
கண்ணகியர் பட்டகதைக் காண்
(3)

#நடைமுறைச்_சான்றுகள்_மூன்று
#கேள்விகள்

பண்பில்லா காவலர்கள் பாதகங்கள் செய்வதற்குக்
கண்ணீர்தான் சிந்தணுமா சொல்
(4)

பண்பில்லா காமுகர்கள் பைத்தியமாய்ப் பாய்வதற்குச்
செந்நீர்தான் சிந்தணுமா சொல்
(5)

பண்பில்லா ஆட்சியர்கள் பல்லிழிப்பைப் பார்ப்பதற்கா
உண்மையிலே ஊடகங்கள் சொல்
(6)

#தீர்வுகள்_மூன்று

பண்பில்லா மூடர் பதவியில் ஆடினால்
தண்டிக்க தண்டம் எடு
(7)

பண்பில்லா ஈனர் பணியில் உறங்கினால்
கண்டிப்பாய் நீக்கி விடு
(8)

பண்பில்லா வீணர் பலிபாவம் செய்திட்டால்
வன்பொருளை வெட்டி விடு
(9)

#வள்ளுவம்_ஒன்று

பண்பில்லா கீழோர்கள் பார்வைக்கு மேலிருந்தும்
பண்புள்ள மேலோரா கார்!
(10)

✍️செ.இராசா

#தலைப்பு_பண்பிலார்
#வள்ளுவர்_திங்கள்_120

குறள் 973:
மேலிருந்தும் மேலல்லார் மேலல்லர் கீழிருந்தும்
கீழல்லார் கீழல் லவர்