உயிரணு போட்டியின் வெற்றியிலே
உயிராய் உலகினில் ஜனித்திடுவோம்!
மரபணுப் பதிவின் போட்டியிலே
பரம்பரை யாதெனப் பதிவாகும்!
படிப்பில் போட்டி வந்துவிட்டால்
பண்பும் அறிவும் தமதாகும்!
பதவிப் போட்டி வந்துவிட்டால்
பழகிய நட்பும் பகையாகும்!
அதிகாரப் போட்டியின் விளைவாக
அமைதியின் இருப்பு இழப்பாகும்!
சகோதரப் பாசப் போட்டியெல்லாம்
பிரிவினை வந்தால் வேறாகும்!
ஆயுதப் போட்டியின் உச்சத்திலே
அகிலம் அழிந்திடும் போராகும்!
அறத்தை சேர்ப்பதில் போட்டியென்றால்
அன்பின் குணமே செழித்தோங்கும்!
பொருட்கள் சேர்ப்பில் போட்டியென்றால்
பொறாமை குணமே தலையோங்கும்!
மனிதன் போட்டி கொள்ளாத
மரணம் உயிரின் முடிவாகும்!
No comments:
Post a Comment