திருப்புமுனை

  

#திருப்புமுனை

நெடுஞ்சாலைகள் எல்லாம்
நேர்கோட்டில் இருந்தாலும்
திருப்புமுனைகள் வந்தால்
திரும்பத்தான் வேண்டும்.....

என்னதான் முக்கிய நாயகரே
முன் வந்து நடித்தாலும்
கதையில் திருப்புமுனை இல்லேல்
யாரும் திரும்பிக்கூட பார்க்க மாட்டர்...

திருப்புமுனைகள்‌‌
திடுதப்பென்று வந்தால்
திடுக்கிட வேண்டாம்...
முடிந்த அத்தியாயத்தில் நின்று
மூச்சுவாங்கிக் கொள்ளுங்கள்
அடுத்த அத்தியாயத்திற்காய்
ஆயத்தமாய் நில்லுங்கள்...

திருப்பு முனைகள்
திருப்பி விடக்கூடியவை...
அவசரம் வேண்டாம்.....
ஒழுங்காய் மடைமாற்றினால்
உச்சத்திற்கும் போகலாம்...

யோசித்துப் பாருங்கள்....

கல்லக்குடி போராட்டம்
கலைஞருக்குத் திருப்புமுனை...
திமுக வெளியேற்றம்
எம்ஜிஆருக்குத் திருப்புமுனை..
ராஜீவ் மரணம்
ஜெயலலிதாவுக்குத் திருப்புமுனை...
ஜெயலலிதா மரணம்
எடப்பாடிக்குத் திருப்புமுனை...

இங்கே....
சில திருப்புமுனைகள் சாதனையாகும்
மெஸ்ஸியின் வெற்றியைப்போல...
சில திருப்புமுனைகள் வேதனையாகும்
காமராஜரின் தோல்வியைப்போல...
சில திருப்புமுனைகள் ரோதனையாகும்
கோவிட் உயிரிழப்புபோல..
சில திருப்புமுனைகள் போதனையாகும்
சென்னைப் பெருவெள்ளம்போல...

திருப்புமுனை என்பது
காலம் பட்டை தீட்டும் உலைக்களம் மட்டுமல்ல
ஞாலம் தன்னைக் காட்டும் சமர்க்களமும்கூட..

அதில் வெற்றி தோல்வியல்ல சுவாரசியம்...
அந்தத் திருப்புமுனையே சுவாரசியம்...

வரட்டும் திருப்புமுனை‌கள்..
வரலாற்றில் கட்டாயம் இடமுண்டு...

செ. இராசா