முரண்கள்

 

 

மனம் விரும்புவது வெற்றியை
ஆன்மா விரும்புவது அமைதியை
இந்த வாசகம்;
படித்ததில் பிடித்தது மட்டுமல்ல
பிடித்ததில் பதிந்ததும்கூட..
ஆம்..
யோசித்துப் பாருங்கள்?!
இந்த வாழ்க்கையில்தான்
எத்தனை எத்தனை முரண்கள்?!

ஆரவாரமிக்கது வெற்றி
அடக்கமானது அமைதி

பேசுபொருளாவது வெற்றி
பேசாமலிருப்பது அமைதி

புகழ்ச்சியில் திளைப்பது வெற்றி
இகழ்ச்சியிலும் சிரிப்பது அமைதி

பிரபலமாக்குவது வெற்றி
சுயபலமாக்குவது அமைதி

கவிஞனாய்க் காட்டுவது வெற்றி
கவிதையாய் மலர்வது அமைதி

சொல்லி அடிப்பது வெற்றி
சொல்லாமல் வெல்வது அமைதி

சாதனையில் கிடைப்பது வெற்றி
சோதனையில் தெளிவது அமைதி

ஆர்வமிகு இலட்சியம் வெற்றி
ஆத்மார்த்த இலட்சியம் அமைதி

தோல்வியின் தோல்வி வெற்றி
வெற்றியிலும் வெற்றி அமைதி

இப்படி வெற்றிக்கும் அமைதிக்குமே
எத்தனை எத்தனை முரண்கள்?!

எங்கே இப்போது சொல்லுங்கள்
வெற்றி வேண்டுமா?
அமைதி வேண்டுமா?

செ. இராசா