காதலர் தின வாழ்த்துகள் ==== குறளோசை வெண்பாக்கள்

எல்லா உறவும் உறவல்ல அன்பில்பொய்
இல்லா உறவே உறவு!
(1)

காதலில் காதல் கவிக்காதல் நன்காதல்
காதலுள் எல்லாம் தலை!
(2)

பார்க்கப் பழுதற பார்த்தவை பார்த்தபின்
நீக்கல் தவறாம் நினை!
(3)

எண்ணி இணைதல் இயல்பே இணந்தபின்
எண்ணாமை என்றும் இழுக்கு!
(4)

விரைவில் இணைந்த உறவெல்லாம் காமம்
கரையக் கலையும் கனவு!
(5)

காதலுக்கும் உண்டோ கரைமீறும் ஓருணர்(வு)
ஆதலால் கண்ணாலம் செய்!
(6)

அவளழகு பேரழகு ஆவ்;என்பர் காதல்
அவதியிலே வீழ்கின் றவர்!
(7)

எக்காதல் எத்தனைநாள் ஆயினும் அக்காதல்
பொய்க்காமல் நீண்டால் அழகு!
(8)

காதல் எனச்சொல்வர் காண்கையில் தோன்றாது
காதல்பால் உள்ள(க்) கசப்பு!
(9)

கற்பும் நெறியும் கடைபிடிக்கும் காதலர்கள்
நற்றமிழ்போல் வாழட்டும் நன்று!
(10)

செ. இராசா