கோடு

 

மனிதன் கண்டறிந்த

முதல் எழுத்துருவே

இந்தக்கோடுதான்..

மரம் முதல்

மனிதன் வரை

தண்டாகவோ

முதுகெலும்பாகவோ

இயற்கை வரைந்த

கோடுகள்தான்

எத்தனை எத்தனை?!!

இங்கே சில கோடுகள்

நிலையானவை

மண்ணில்

மலைகள் போடுவதுபோல்

சில கோடுகள்

நிலையற்றவை

சுனாமியில் மாறும்

கரைக்கோடுகள்போல்

இங்கே

சில கோடுகள்

மீற வேண்டியவை

வருணாசிரம மை இருந்தால்..

சில கோடுகள்

மீறக் கூடாதவை

இலட்சுமணரேகை போலிருந்தால்.

கோடு

செங்கோல்போல் நிமிர்ந்தால்

வழிகாட்டும் பாதை...

அதுவே

குடிகாரன்போல் கிடந்தால்

விழிமூடும் போதை...

கோடாமை என்னும்

கோணாமை வேண்டுமென்றார்

வள்ளுவர்...

ஆனால் இங்கே

அப்படியா உள்ளது?

அதிகாரக் கோடுகள்

அழுத்தம் தருவதால்

பிரிவினைக் கோடுகள்

சீனச்சுவர்போல் நீள்கிறது.

ஆச்சாரக் கோடுகள்

அசிங்கம் செய்வதால்

எல்லைக் கோடுகள்

சிந்தூராய் வெடிக்கிறது..

சில கோடுகள்

இருந்தும் இல்லாத

மாயக் கோடுகளே...

வானம்தொடும் பூமிபோல

சில கோடுகள்

புரிந்தும் புரியாத

சாயக் கோடுகளே

இன்னும் சாபம் தேடுவதால்...

போடுங்கள் கோடு

சாலைகளில் உள்ளதுபோல்

பயணத்தை பத்திரப்படுத்த.

போடாதீர்கள் கோடு

சமுதாயத்தில் உள்ளதுபோல்

ஆட்களை பிளவுபடுத்த..

செ. இராசா

தமிழ் என்கிற பெயரை வைத்து

 

கடந்த இரண்டு நாட்களாக இரு நிகழ்வுகளில் கலந்து கொண்டேன் உறவுகளே.. ஒன்று #எழுமின் எனப்படும் கத்தார்வாழ் தமிழ் தொழில் முனைவோர் மற்றும் நிபுணர்களுக்கான கூட்டமைப்பு. மற்றொன்று உலகலாவிய தமிழ் பொறியாளர்களுக்கான கூட்டமைப்பு.

இரண்டிலுமே மிகப்பெரிய ஆளுமைகள் சிறப்பு விருந்தினராக கலந்து கொண்டனர். முன்னதில் திரு திருநாவுக்கரசு IPS, DIG, இரண்டாவதில் இஸ்ரோ விஞ்ஞானி திரு. மயில்சாமி அண்ணாதுரை அவர்கள் என்பது சிறப்பு.

இதில் முதல் நிகழ்வு பற்றி சொல்வதாக இருந்தால், கூட்டம் சற்றே குறைவாக இருந்தாலும் தமிழ் தமிழ் தமிழென்று முழங்கியதும் அறம் சார்ந்த ஒன்றை மையப்படுத்திப் பேசியதும் ஒருவொருக்கொருவர் ஊக்கம் தருவதாக அமைந்ததுமாய் மிகவும் அற்புதமாக இருந்தது.

இரண்டாவது நிகழ்வு மிகப்பெரிய அளவிலான கூட்டமாக கூட்டி இருந்தாலும், தமிழ் வெறும் ஊறுகாய்போலவே இருந்தது மிகப்பெரிய மனவருத்தத்தைக் கொடுத்தது. இதற்கேன் தமிழ் பொறியாளர் என்ற பெயர் வைத்தார்கள் என்று தெரியவில்லை. அதுதான் Institute of Engineers, Qatar chapter இருக்கிறதே.... கேட்டால்..

மற்றவர்களுக்குப் புரியாது என்பதால் ஆங்கிலமாம்... ஏங்க... அப்புறம் எதற்கு தமிழ் பொறியாளர்கள் என்ற பெயர்?

சரி... அதுதான் அப்படின்னா....பிரிவினைக் கோடுபோல் ஒரு தடுப்பு வேறு....கைதட்ட வந்தவர்கள் கோட்டுக்குப் பின்பும், வழக்கம்போலவே எல்லா அமைப்புகளிலும் தலைகாட்டும் பெரியவர்கள் கோட்டுக்கு முன்னருமாய் அமர வைக்கப்பட்ட விதம் இன்னும் நாம் எப்படி இருக்கிறோம் என்பதை வெட்ட வெளிச்சமாக்கியது. கடவுளே...என்று மாறுமோ?!!...(பொதுவாகவே முதல் இரு வரிசைகளில் பெயர் எழுதி வைத்தால் யாரும் அமரமாட்டார்கள் என்கிற நாகரிகம் கூட தெரியாதென்று நினைத்து விட்டார்கள்போலும்)

தமிழ் என்கிற பெயரை வைத்துக் கொண்டு தயவுகூர்ந்து இந்தமாதிரி முன்னுதாரணமாக இனியும் இல்லாமல் இருந்தால் அதுவே நாம் தமிழுக்குச் செய்யும் நல்லறமாக அமையும் என்றுகூறி இத்துடன் இப்பதிவை நிறைவு செய்கிறேன்.

நன்றி நன்றி!

செ. இராசமாணிக்கம்

போடு போடு டீயப் போடு

 

போடு போடு டீயப் போடு
பாய்லர் டீயப் பார்த்துப் போடு

பசியப் போக்கிடும் அமுதம் பாருங்க
குஷியத் தூண்டிடக் கொஞ்சம் போதுங்க
உழைக்கும் மக்களின் உதிரந் தானுங்க
களைப்பப் போக்கிடும் சோம பானங்க

போடு போடு டீயப் போடு
பாய்லர் டீயப் பார்த்துப் போடு

வெள்ளைக் காரன் கொடுத்த பானம்
அடிச்சான் அவனும் கொள்ளை லாபம்
ஆனால் அதுலாம் பழைய காலம்
போனான் அவனும் ரொம்ப தூரம்

இன்று உன்னது நாளை அவனது
இதுதான் வாழ்வின் போதனைங்க..
சரியாப் புரிஞ்சு முறையா வாழ்ந்தா
அதுவேப் போதும் சாதனைங்க...

விக்கீ ஜெமினீ எதுக்குங்க
டீக்கடை பெஞ்சே போதுமுங்க
அளவாக் குடிச்சா நல்லதுங்க
தெளிவைக் கொடுக்கும் தியானமுங்க

போடு போடு டீயப் போடு
பாய்லர் டீயப் பார்த்துப் போடு

அரசியல் வேணுமா?!
தத்துவம் வேணுமா
அனைத்தும் புழங்கும் டீக்கடைங்க

உலகம் வேணுமா?
உள்ளூர் வேணுமா?
உடனே வாங்க டீக்கடைங்க..

நாட்டை ஆளும் தலைவருங்க
தேநீர் கடைதான் தொடக்கமுங்க
எதுவும் குறைச்சல் இல்லையிங்க
எண்ணம் போல வாழ்க்கையிங்க

போடு போடு டீயப் போடு
பாய்லர் டீயப் பார்த்துப் போடு

Black டீ பால் டீ
light டீ Lime டீ
Strong டீ Herbal டீ
பெப்பர்டீ புதினா டீ
இஞ்சி டீ ஏலக்காட்டீ
துளசி டீ ஆவாரம்பூ டீ
Green டீ மசாலா டீ
Bubble டீ பாய்லர் டீ
Hot டீ Cold டீ
பனங் கருப்பட்டி டீ
நாட்டுச் சர்க்கரை டீ

எந்த டீ சார் வேணும்?!

ஏ...கிரீன் டீ ப்ளாக் டீ ஸ்ட்ராங்டீ- எனக்கு
பொழப்பே ஓடாதுநீ இல்லாட்டி
ஏ..லெமன்டீ இஞ்சி டீ பாய்லர் டீ
என்னை
உசுப்பும்நீ ரெண்டாவது பொண்டாட்டி

செ. இராசா 

சுயநலம் பெருகிய சுற்றங்கள் இங்கே

 

சுயநலம் பெருகிய சுற்றங்கள் இங்கே
சுயபலம் பெருக்கிட சூத்திரம் எங்கே?
நயமுடன் பழகிடும் நரிகளும் இங்கே
தயவுடன் அணுகிட உறவுகள் எங்கே?

அழுவதைத் தருகிற ஊடகம் இங்கே
அழுவதைத் தடுக்கிற ஊர்க்கரம் எங்கே?
விழுகையில் வருகுது விமர்சனம் இங்கே
விழுவதைத் தாங்கிடும் உயர்சனம் எங்கே?

இருக்கையில் மறப்பவர் பலருமே இங்கே
இறந்தபின் நினைப்பவர் உண்மையில் எங்கே?
தருகையில் பெறுபவர் தரணியில் இங்கே
தரும்கையாய் மாறிட முனைபவர் எங்கே?

கவிதையில் கரைகிற கவிஞனும் இங்கே
கவிழ்கையில் கரம்தரும் கலைஞனும் எங்கே?
புவிதனில் வருபவர் புகலிடம் இங்கே 

புவிதனை விடுபவர் புகுவதும் எங்கே?

இரண்டாம் பிறவி தந்த இறைவனுக்கு நன்றி...

 

இரண்டாம் பிறவி தந்த

இறைவனுக்கு நன்றி...

உயிரின் வலி வழியை உணர்த்திய

அந்தப் பெருவிபத்திற்கும் நன்றி...

அன்புப் பெருவள்ளத்தில் நனைத்த

அனைவருக்கும் நன்றி...

இப்படி என்னதான் கூறினாலும்

ஈடுசெய்ய முடியா சேவை செய்த

மருத்துவ செவிலியர்களுக்காய்

யாம் என்ன செய்துவிட முடியும்?!

இந்தப் பதிவைத் தவிற..

ஆம்...

108 போற்றி

108 சரணங்கள்

108 மந்திரங்கள் கூறியவன்

108ல் பயணிப்பேன் என

என்றைக்கும் எண்ணியதே இல்லை

இதையெல்லாமா எண்ணுவார்கள்?!

புரிகிறது!

அரசாங்க 108

அரசு மருத்துவமனை

செல்வதே வழக்கம்;

அதை மடை மாற்றி

அருகாமை அப்பல்லோவிற்கு

அனுமதித்த அனைவருக்கும் நன்றி!

உடைந்துபோய் வந்தவனை

உருளை வண்டியில் வைத்து

பழைய உடை கிழித்து

பச்சை உடை தரிவித்து

எந்தவித முகச்சுழிப்பும் இல்லாமல்

அந்தரங்க ரோமங்களையும் அகற்றி

ஒன்றுக்கு வடிவதற்காய்

ஒரு குழாயைச் சொறுகி

அருவருப்பே இல்லாமல்

அழுக்கைத் தொடைத்து

சலைனும் மருந்துமாய்

சகலமும் கொடுத்து

அறுவை சிகிச்சை வழியே

அன்பை அறுவடை செய்த அனைவருக்கும்

இந்த

இரண்டாம் ஆயுள் உள்ளவரை

எப்போதும் உணர்ந்திருப்பேன்!

எம்; நன்றியை உரைத்திருப்பேன்!

நன்றி மருத்துவர் முத்தமிழ் ஐயா!

நன்றி செவிலிய உறவுகளே!

செ.இராசா

குண்டலினி யோகம்

 

உடலும் உயிரும் மனசுமிங்கே
சேர்ந்ததுதான் மனுஷங்க...
இதுல எதுவும் குறைஞ்சதுன்னா
அதுக்குயென்ன பேருங்க?
மூனும் முறையா இருந்ததுன்னா
நோய்களில்லா வாழ்வுங்க...
நாம நல்லா வாழுவதே
உண்மையான சொர்க்கங்க...

அதுக்கு?

குண்டலினி யோகம் பயில வாருங்க..
அண்டமெல்லாம் உணரும்படி மாறுங்க...
கண்டபலன் எத்தனையோ பேருங்க
கண்டுகொள்ள கூப்பிடுறோம் வாருங்க....

எளிய முறைப் பயிற்சி செஞ்சா
உடலு நல்லா இருக்குங்க...
கண்ணை மூடி தியானம் செஞ்சா
மனசு நல்லா இருக்குங்க...
காய கல்பம் பயிற்சி செஞ்சா
உசுரு நல்லா இருக்குங்க...
தன்னைத் தானே ஆய்வு செஞ்சா
வாழ்க்கை நல்லா இருக்குங்க...

அதுக்கு?!

குண்டலினி யோகம்...

அறம் வலியுறுத்தல்

 

#அறம்_வலியுறுத்தல்

1. #நூல்கள்
போனது போக
......புவியினில் மிஞ்சியதே
ஞானத் தருவென்றால்
........நன்குணர்வீர்- மோனத்தில்
நல்வழி காட்டி
.......நலமுடன் சென்றிட
நல்லற நூல்பயின்றால்
.......நன்று!

2. #திருக்குறள்
அத்தனை நூல்களையும்
........ஆய்ந்தறிந்து கற்றுணர
பத்துமோ ஓராயுள்?
.......பத்தாதே- சத்தியமாய்
உள்ளத்தை மாற்றி
.......உலகத்தை உய்விக்க
வள்ளுவநூல் ஒன்றே
........வழி

3. #கண்ணகி
மன்னவன் தீர்ப்பால்
........மணவாளன் மாய்ந்தசெய்தி
தன்னை வதைத்தும்
........தளராமல் - நின்றொருத்தி
மன்றத்தில் போராடி
.........வாதாடி வென்றதுவே
மண்ணில் அறம்காத்த
.........மாண்பு

4. #கண்ணன்
மாமனாய்த் தூதுசென்று
.......மைத்துனனாய்க் கூடநின்று
கோமகனாய் நாடாண்ட
.......கோபாலன்- மாமதியோன்
பெண்ணின் துகிலுரித்த
........பேய்களை சாய்த்தன்று
மண்ணறம் காத்ததவன்
.........மாண்பு!

5. #கர்ணன்
மானத்தைக் காத்தவனின்
......மானத்தைக் காத்திட
ஈனரெனக் கண்டும்
.....இணங்கினான்- ஞானவான்
கர்ணனின் அச்செய்கைக்
.....கட்டாயம் தப்பில்லை
அர்ப்பணிப்பில் செய்யும்
.....அறம்?

6. #விகர்ணன்
அண்ணன்கள் செய்கை
...அறமில்லை என்றொருவன்
உண்மையைச் சொன்னான்
....ஓங்கியன்று- மண்டபத்தில்
வேகமாய்ச் சொன்ன
.....விகர்ணனின் செய்கையும்
ஆகியது நல்ல அறம்!

7. #கும்பகர்ணன்
தப்பென்று சுட்டியும்
.....தன்குற்றம் காணானின்
தப்புக்காய்த் தானும்
....தயாராகி- ஒப்பியே
அன்னமிட்ட அண்ணனுக்காய்
...அன்றுகும்ப கர்ணனும்
சென்றறம் காத்துநின்றான்
....செத்து!

8. #தர்மன்
எந்த இடரிலும்
.......எள்ளளவும் மாறாத
விந்தை மனிதரின்
........நேர்மையை- சிந்தித்தால்
தர்மனைப்போல் இல்லைத்
........தரணியிலே வேறொருவர்
தர்மனே தர்மத்தின்
.........தாய்!

9. #அரவான்
தன்னுயிர் தந்தேனும்
.....தாய்மண்ணைக் காப்பாற்றி
தன்னறம் காப்போரின்
.....சால்பறிவோம்- என்றாலும்
தன்னைப் பலியிட
......தானாக முன்வந்தோன்
அன்பின் அரவானே
.....அன்று!

10. #அறம்வலியுறுத்தல்
அறத்தை வலியுறுத்தும்
......அத்தனையும் உண்மை
மறவாமல் பின்பற்றி
.......வாழ்வோம்- சிறப்பாய்
அகத்தில் அழுக்கின்றி
.......ஆனவரை ஈந்தால்
சகமே உறவாகும்
.........சார்ந்து!