உடைஞ்சபல்லே மீண்டும் மீண்டும் உடையுது

 

 

 உடைஞ்சபல்லே மீண்டும் மீண்டும் உடையுது- அட
முடிஞ்சகதை மீண்டும் மீண்டும் தொடருது

என்னக் கணக்கிதுவோ
....எதுவும் விளங்கவில்லை..
என்ன வழக்கிதுவோ
....ஏனோ முடியவில்லை..

உலகம்போற போக்குல உசரமின்னும் கிடைக்கல...
பயணம்போற போக்குல பல்லுகூட நிலைக்கல..

வயசுமட்டும் ஏறுது...
வாழ்க்கை இன்னும் மாறல...
முயற்சியெல்லைத் தாண்டுது
முடிவு மட்டும் தெரியல...

செ. இராசா

மாற்றத்தைக் காட்டுவாயோ

 

 

 இறைவா:உன் காலடியில்
‌.....ஏழை:இவன் வேண்டுகிறேன்
........என்நிலையை மாற்றுவாயோ?!

நிறைவான வாழ்க்கையினை
....நிசமாக்க வேண்டுகிறேன்
........நிம்மதியைக் கூட்டுவாயோ?!

குறையான மாந்தரையும்
.....குணமாக்க வேண்டுகிறேன்
...........குற்றங்களை நீக்குவாயோ?!

மறைந்தோடும் முன்னாலே
......மனம்:ஓங்க வேண்டுகிறேன்
..........மாற்றத்தைக் காட்டுவாயோ?!

செ‌‌ இராசா

போதை மீட்பு

போதை
என்னதான் உள்ளதென எண்ணி இறங்கிடுவோர்
தன்போக்கில் மூழ்கிடுவார் தாழ்ந்து
(1)

என்றோ எனத்தொடங்கி எப்போதும் என்றாகி
ஒன்றிப் பிணைபவரே உண்டு
(2)

பற்றின்றிப் பற்றிப்;பின் பற்றோடு பற்றுவைத்துப்
பற்றியதே பற்றிவிடும் பார்
(3)

அளவெனச் சொல்லித்தான் ஆரம்பம் ஆகும்
அளவின்றிப் போகும் அடுத்து
(4)

கண்கள் சொருகிவிட கால்கள் தடுமாற
எண்ணம் தடம்மாறு மே!
(5)

மீட்பு
எந்த அலைச்சுழலில் எண்ணங்கள் போகிறதோ
அந்த அலைச்சுழலை ஆய்!
(6)

பதிந்த தடம்பொதிந்த பாதையை மாற்றிப்
புதியதோர் பாதையைப் போடு
(7)

இருபத்தி ஓர்நாட்கள் ஏதேனும் செய்தால்
ஒருவாறு மா(ற்)றலாம் ஓர்ந்து
(8)

தவறென்று கண்டும் தவறுபவர் எல்லாம்
தவம்செய்ய வேண்டும் தனித்து
(9)

தனைமறக்கச் செய்யும் தவறிழைக்கும் முன்னே
தனையுணரச் செய்வீர் தவம்
(10)

செ. இராசா

மங்கையா மயானமா

மலர்களுக்குத் தெரியாது
தான் போகுமிடம்
மங்கையா மயானமா என்று..

ஆனாலும் அவையென்றும்
மணம் தர மறுப்பதில்லை.
மரணிக்கும் தருணம்வரை..

செ. இராசா…

அண்ணாமலையே....

நினைத்தாலே முக்திதரும் அண்ணாமலையே
நிறைவுண்டோ நானுன்னை எண்ணாமலயே...

வினைதீர்க்கும் ஆண்டவனே அண்ணாமலையே
விளைவுண்டோ நானுன்னை எண்ணாமலயே‌...

எனையாளும் பைந்தமிழே அண்ணாமலையே
எனைக்கூட மறப்பாயோ எண்ணாமலயே...

உனைப்பற்றும் வரவேண்டும் அண்ணாமலையே
உடனேயேத் தருவாயோ எண்ணாமலயே- ஏதும்
எண்ணாமலயே...

செ. இராசா

குண்டாச் சோறத் தூக்கிக்கிட்டு

குண்டாச் சோறத் தூக்கிக்கிட்டு போறான் பாருடி....
அண்டாச் சோறத் திண்ணாக்கூட அடங்க வில்லடி.....(2)

ஏன்டா ஏன்டா பொடிப்பயலே இப்படி யெல்லாம் உண்டா
வேண்டாம் வேண்டாம் இதுக்குமேல வெடிச்சிடுன்டா குண்டா.....

செ. இராசா

அதிகாரம்

நெருங்கி இருந்தாலும்

தொட்டுவிட முடியாது

அப்படித் தொட்டால்

அங்கே தலை-கீழாகும்

 

உச்சத்தில் இருந்தாலும்

வரம்புமீற முடியாது

அப்படி மீறினால்

அதன் நிலை வேறாகும்

 

இப்போது ஆடினாலும்

எப்போதும் ஆட முடியாது

ஆட்டம் கை மாறினால்

அடக்கம் தீர்ப்பாகும்

செ. இராசா

வேர்க்கடலை சட்னியையும்

 

வேர்க்கடலை சட்னியையும்

.....வேகவச்ச இட்லியையும்

பார்க்கின்ற போதேநீர்

.....பாய்ந்துவரும்- யார்க்கும்

நலன்தரும் நல்லுணவாம்

.......நம்முணவை உண்டால்

பலன்தரும் வாழ்வுண்டு

.......பார்!

 

செ. இராசா

அத்தனைப் போட்டியிலும் ....அற்புதமாய் ஆடினீர்

  

அத்தனைப் போட்டியிலும்
....அற்புதமாய் ஆடினீர்
....... அப்படியே ஆடுவீரோ?
இத்தரை மீதினிலே
....இன்னுமொரு சாதனையை
.......இன்றைக்கும் செய்யுவீரோ?!
பித்தரைப் போலசிலர்
.....பேசுகிற வாய்களிலே
.......பேட்டாலே போ(மூ)டுவீரோ?
சித்தரைப் போலிருந்து
..... சிந்தனையில் மாறாமல்
......... செம்மையாகக் காட்டுவீரோ?!

இந்திய அணி வெற்றிபெற மனமார வாழ்த்துகிறேன்!
இனிய மனமார்ந்த வாழ்த்துகள்!

செ. இராசா

சோன்பப்புடிபோல

  

சோன்பப்புடிபோல
.......நீ சோக்காகீற பொண்ணு!
டான்கில்லருபோல
.......ஏன் டபாய்க்கீற நின்னு!
வா இப்படி வந்து
.......நீ என்ன வேணும் சொல்லு?!...
டாப் டக்கரு கிஃப்டு
.......அடி நாந்தான் உனக்கு பெஸ்டு!

செ.‌இராசா