போதை மீட்பு

போதை
என்னதான் உள்ளதென எண்ணி இறங்கிடுவோர்
தன்போக்கில் மூழ்கிடுவார் தாழ்ந்து
(1)

என்றோ எனத்தொடங்கி எப்போதும் என்றாகி
ஒன்றிப் பிணைபவரே உண்டு
(2)

பற்றின்றிப் பற்றிப்;பின் பற்றோடு பற்றுவைத்துப்
பற்றியதே பற்றிவிடும் பார்
(3)

அளவெனச் சொல்லித்தான் ஆரம்பம் ஆகும்
அளவின்றிப் போகும் அடுத்து
(4)

கண்கள் சொருகிவிட கால்கள் தடுமாற
எண்ணம் தடம்மாறு மே!
(5)

மீட்பு
எந்த அலைச்சுழலில் எண்ணங்கள் போகிறதோ
அந்த அலைச்சுழலை ஆய்!
(6)

பதிந்த தடம்பொதிந்த பாதையை மாற்றிப்
புதியதோர் பாதையைப் போடு
(7)

இருபத்தி ஓர்நாட்கள் ஏதேனும் செய்தால்
ஒருவாறு மா(ற்)றலாம் ஓர்ந்து
(8)

தவறென்று கண்டும் தவறுபவர் எல்லாம்
தவம்செய்ய வேண்டும் தனித்து
(9)

தனைமறக்கச் செய்யும் தவறிழைக்கும் முன்னே
தனையுணரச் செய்வீர் தவம்
(10)

செ. இராசா