உனை நினைத்தாலே போதும்..
நாக்கடியில் நதி சுரக்கும்
நீர்க்கடியில் இதழ் குளிக்கும்
பற்றிடக் கரம் ஏங்கும்...
பற்றினால் உடை விலகும்..
விரல்சேர்ந்து கொடை பிடிக்கும்
சிரம்புகுந்து தனை நனைக்கும்
பற்களிடைத் துண்டாக்கும்
பையப் பைய நீர் கலக்கும்..
கண்ணிமைகள் கதவடைக்கும்...
இன்பத்திலே பழம் இனிக்கும்
இறுதியிலே அது புளிக்கும்...
#புளியம்பழம்
செ. இராசமாணிக்கம்
நாம்தூக்கிய பிள்ளைகள்
நம்மைத் தூக்கையில் ஆனந்தமே...
*
பாரம் பெரிதல்ல
பாசத்தின் முன்னே..
*
உள்ளத்தில் உரமிருந்தால்
உயரங்கள் எளிதே...
பழக்கடை ஒன்றிற்குப் போனால்
....பார்க்கலாம் பற்பல பழங்கள்!
பழவகை ஒன்றிற்குள் போனால்
....பார்க்கலாம் பற்பல வகைகள்!
பழங்களை ஒவ்வொன்றாய் உண்டால்
....பார்க்கலாம் பற்பல ருசிகள்!
பழச்சுவை ஒவ்வொன்றைப் போல்தான்
...பார்க்கிறோம் பற்பலக் கவிகள்!செ. இராசா
ஸ்ரீ ரங்க ரங்கதிரு சேவகனே
சீர் செய்ய வந்தகுரு வானவனே
நாத்திகர் போற்றுகின்ற ஆத்திகனே
கோத்திரத் தீயணைக்க வந்தவனே..
ஸ்ரீ ராம ராமராம ராமானுஜா
ஸ்ரீ ரங்க ரங்கநாத ராமானுஜா
தன்னலம் கண்டிடாத தத்துவனே
சொன்னசொல் மந்திரத்தைச் சொன்னவனே
விக்ரகம் மீட்டுவந்த வித்தகனே
திக்கெட்டும் உய்யவழி செய்தவனே...
ஸ்ரீ ராம ராமராம ராமானுஜா
ஸ்ரீ ரங்க ரங்கநாத ராமானுஜா
மார்க்கங்கள் தாண்டிவென்ற மகராசனே
ஏற்கின்ற பாதைதந்த இறைநேசனே..
சாத்திர நேர்த்திசெய்த சாமர்த்யனே
ஆத்திரம் என்றுமில்லா ஆனந்தனே..
ஸ்ரீ ராம ராமராம ராமானுஜா
ஸ்ரீ ரங்க ரங்கநாத ராமானுஜாசெ. இராசா
(உலகிலேயே மிகப்பெரிய இராமானுஜ சமத்துவச் சிலை 216 அடி உயரத்தில் ஹைதராபாத்தில் வருகிற 5 ஆம் தேதி திறக்கவுள்ள நிலையில் இப்பாடல்)
கதிரவன் எழும்முன்
காணொளியில் ஓர் கானம்...
மெல்லிசைப் பின்புலத்தில்..
துள்ளியதோர் ஓர் குரல்...
வருடும் நாதத்தில்
மறந்தது காலம்...
உருகிய தருணத்தில்
ஊற்றியது கண்ணீர்...
....
நகைத்தாள் இல்லாள்
உதைத்தாள் சொல்லால்
விளக்கேற்றா கண்களில்; நீர்
வடிப்பது பொய்யென்றாள்...
விளக்குவதைக் கேளென்றேன்
விளங்காவிடில் விலக்கென்றென்..
இசையே ஈசனென்றேன்...
ஈசனே இசையென்றேன்..
அவ்விரண்டும் ஒன்றென்றேன்..
அத்வைதம் அதுவென்றேன்..
என்னமோ? என்றுரைத்தாள்
எண்ணமே.....எல்லாமென்றேன்
