அனைத்தும் அறிந்தவர் யார்?! வள்ளுவர் திங்கள் 196

அறிந்ததைப் பின்பற்றி ஆராய்ந்து சென்றால்
அறிந்தவை ஆகும் அணு
(1)

இசைஞானிக் கீடில்லை என்கின்ற போதும்
இசைப்புயல் வந்ததேன் இங்கு
(2)

கவியரசர் ஆண்ட கலைத்துறைக் குள்ளும்
கவிப்பே ரரசராம் காண்
(3)

சச்சினின் சாதனை சத்தியம் ஆயினும்
உச்சத்தில் தோனி உணர்
(4)

பேரும் புகழும் பெரிதாய் இருந்தாலும்
யாரும் இறைவன்முன் எள்
(5)

நீந்துகின்ற ஆற்றிலினை மீன்குஞ்சு கற்றதெங்கே?
ஊர்ந்துவரும் உள்ளறிவால் ஓங்கு
(6)

ஒருவரால் ஆகுமெனில் உன்னாலும் ஆகும்
பெரிதாய் வியக்காமல் போ
(7)

கற்பதைக் கற்றபின்னும் கற்றவர்கள் நன்கறிவர்
கற்றவர்முன் தானோர் கடுகு
(8)

முடிவிலி அண்டத்தின் மூலம்தான் எங்கே?
முடிந்தால் பதில்தா முயன்று
(9)

பிறக்கும்முன் எங்கிருந்தோம் பின்நாளில் யாரும்
இறந்தபின் எங்கிருப்போம் சொல்?
(10)

செ. இராசா