பேசுபொருள்

 

பேசுபொருள் ஆகத்தான்

.....பேசுகிறார் என்றறியார்

பேசுபொருள் பற்றியே

......பேசுகையில்- பேசுவதால்

பேசுபொருள் ஆக்கியவர்

......பேருவகை ஆகின்றார்

பேசுபொருள் யாதுணர்ந்து

......பேசு!

 

செ. இராசா

விருது விருது விருது

 

விருது விருது விருது
கொடுக்குறாங்க விருது
வருது வருது வருது
நீ வந்தா...இங்கே விருது

கூட்டம் சேர்க்க கூப்பாடு போட்டு
கூவிக்கூவி குடுப்பாங்க விருது
நாட்டம் காட்டி நம்மோட ஆளு
வாரமானா வருவாங்க பாரு

எதுக்கு எதுக்கு எதுக்கு- இந்த
பொழப்பு எல்லாம் எதுக்கு?
ஒதுக்கு ஒதுக்கு ஒதுக்கு- உன்னை
செதுக்க நேரம் ஒதுக்கு!

அப்பப் பாரு உன்னோட விருது
உன்னைத் தேடி ஓடோடி வருது!
அப்பக்கூட இல்லைன்னா விருது
விருது என்ன.........ன்னு கருது!

செ. இராசா

பிறந்தநாள் பாட்டு (பொதுவான பாடல்)

பேரின்ப வாழ்வே வாழ்க
பேரின்ப வாழ்வே வாழ்க

பூமிக்கு வந்த நாள்..
.....பூமிக்கு வந்த நாள்!
புத்தாடை ஏதுமின்றி
.... பூமிக்கு வந்தநாள்!
ஈரைந்து மாதங்களாய்
.... ஈரத்தில் மூழ்கியே
பாரினைக் காணவேண்டி
....பாய்ந்தோடி வந்தநாள்

கண்ணே மணியே சிட்டே
ஏ பட்டே...என் செல்லம்
அழகே அமுதே அன்பே
ஏ..அறிவே..என் சாமி
உலலலலலலலா...ங்கு
உலலலலலலலா...ங்கு
என் செல்லம் செல்லம் செல்லம்
என் சாமி சாமி சாமி

சாதிக்க வந்த நாள்
....சாதிக்க வந்த நாள்
தாய்தந்தை மூலமாக
...சாதித்தே வந்த நாள்
வையகம் பேரைச்சொல்ல
...வாழ்வதே வாழ்க்கையென
மெய்யெனும் ஞானம்பெற
...வாழ்த்துவோம் வாங்களேன்..

பேரின்ப வாழ்வே வாழ்க
பேரின்ப வாழ்வே வாழ்க

புதிய உலகைக் காண -நீ
புவியில் உதித்த நாளே..
ஒளிரும் உலகைக் காண- நீ
வெளியில் குதித்த நாளே..

இதயம் இரண்டும் மகிழ- உன்
உதயம் நிகழ்ந்த நாளே...
இன்பம் எங்கும் பெருக- நீ
இறங்கி வந்த நாளே...

இனிய பிறந்தநாளே - இது
இனிய பிறந்தநாளே
இனிமை மிகுந்த நாளே- இது
இறைவன் கொடுத்த நாளே...

வாழ்க வாழ்க வாழ்க வாழ்க நீ
நீண்ட காலம் வாழ்க
வாழ்க வாழ்க வாழ்க வாழ்க நீ
நீண்ட காலம் வாழ்க

ஆலம் விழுது போலே- நீ
ஆழம் ஊன்ற வாழ்க
ஞான வேதம் போலே-நீ
ஞாலம் ஆள வாழ்க

அன்பும் அறமும் சேர்ந்த- நற்
பண்பைப் போற்றி வாழ்க
தன்மை மேலும் உயர-நம்
தமிழைப் போற்றி வாழ்க

செ. இராசா

மெட்டு: கந்தன் இருக்கும் இடம்----இயக்குநர் திரு. பேரரசு

 

(இன்றைய தினம் இயக்குநர் திரு. பேரரசு அவர்களுடன் நடந்த ஒரு பேட்டியில் நம் நண்பர் மற்றும் திரைப்படப் பாடகர் திரு. இன்பக்கலில் அவர்களின் இனிய குரலில் அடியேனின் வரிகளில் திடீரென்று ஒரு பாடல் ஏற்றி பாடப்பட்டது)

பல்லவி
அண்ணன் எடுத்தபடம் செம்ம ஓட்டம்
அது போலமைஞ்சா சேருமுங்க நல்ல கூட்டம்....(2)

அண்ணன் தந்த பாட்டுயெல்லாம்
செம்ம ஹிட்டுங்க...அது
தலதளபதி இரண்டுபேர்க்கும்
செம்ம பிட்டுங்க...

(இப்பவுந்தான் எடுக்குறாங்க கழுதையாட்டம்- அட
மனசுக்குள்ள உண்மையில
ஒருவித வாட்டம்)

அப்பா சாமி....நீ கொஞ்சம் வாநீ
அண்ணன்போல காமி...இல்லையினா போநீ...
 

சரணம்
செண்டிமண்டு ஆக்க்ஷன்
படம் திருப்பாச்சி பாரு
அடுத்தபடம் சிவகாசி
அதுக்கு ஈடு ஏது?!

தளபதிக்கு இரண்டுதந்து
தலைக்கும் செஞ்சார் ஒன்னு
திருப்பதியத் தேடிப்பாரு
திருப்பவரும் கண்ணு

தர்மபுரி படம் கொடுத்த
தங்கமான மனுசன்டா
பழனி படம் கொடுத்த
பத்தரமாத்துத் தங்கம்டா
திருத்தணி படம் கொடுத்த
தெய்வம்போல மனசுடா
திருவண்ணாமலை எடுத்த
அண்ணன் நம்ம உறவுடா

சீமைப் பிள்ளைடா
சிவகங்கை சீமைப் புள்ளடா
டஃப் கொடுக்கத்தான்
இவன் பொறந்திருக்கான்டா
நேர்மையாக பேட்டிதரும்
இவரைப் போல ஆளிருக்கா
நைனா சொல்லு நைனா

செ.‌இராசா

அதே ஆறு'தான்
ஆனால் புதிய நீர்

குறள் அந்தாதி---இருக்கின்ற நேரம் இருபத்தி நான்கை

இருக்கின்ற நேரம் இருபத்தி நான்கைச்
சரியாய் வகுப்போன் தலை!
(1)

தலைமைப் பணியில் தனித்துவம் தோன்ற
கலையாய்ப் பணியைக் கருது!
(2)

கருதிய யாவையும் கைகூட வேண்டின்
செருக்கின்றி எப்போதும் செய்!
(3)

செய்கின்ற செய்கையை சிந்தையில் ஒட்டிப்பின்
செய்கின்ற செய்கை சிறப்பு
(4)

சிறப்பெனச் சொல்லி சிறுநகை பூத்தால்
உறவுகள் கூடும் உணர்
(5)

உணராமல் பேசும் உரையை விடவும்
உணர்ந்தபின் மௌனம் உயர்வு
(6)

உயர்வான எண்ணம் உயர்த்துவது திண்ணம்
முயன்றால் கிடைக்கும் முடிவு
(7)

முடிவை எதிர்நோக்கி முன்னேறிச் செல்லத்
துடிப்புடன் வேண்டும் துணிவு
(8)

துணிவைத் துணையாக்கி சோராமல் சென்றால்
பணியும் மலைகூடப் பார்
(9)

பார்க்க இயலா பதவிக்குச் சென்றாலும்
யார்க்கும் எளிதாய் இரு
(10)

செ. இராசா

இரவிலோர் ஆட்டம்

 இரவிலோர் ஆட்டம்
......இசைவிலோர் மூட்டம்
பரவிடும் நாட்டம்
.......பரிசாய்ச்- சிரம்காட்டும்
மீண்டுமோர் ஓட்டம்
.......விழிக்கும் வினைக்கூட்டம்
நீண்டிடும் வாட்டம்
........நிதம்!

செ. இராசா

வினைவிதி

 

வினைகளைக் களையவே
.......விளைந்தவர்* மீண்டும்
வினைகளுள் சுழல்வது
.......வினைவலி அன்றோ?
வினைவலி குறையவே
.......விழைபவர்* கூட
வினைகளைப் பெருக்கியே
.......விழுகிறார் அன்றோ?!

வினைகளை ஒதுக்கிட
......முடிவதும் இல்லை!
வினைவலி தடுத்திட
.......முயல்வதும் இல்லை!
வினைவழி கடக்கையில்
......விளைந்திடும் தொல்லை
வினைவிதி புரிந்தவர்
......வினைகளில் இல்லை!

செ. இராசா

*விளைந்தவர்- பிறந்தவர்
*விழைபவர்- விரும்பியவ

நல்லூர் கந்தசாமிக்கான பாடல்

தொகையறா

சங்கத்தமிழ் கண்டத் தமிழனை
பொங்கும்கடல் கொண்டப் பொழுதினில்
வந்துக்கரம் தந்தத் தலைமகன்
….........................வடிவேலன்!
எங்கும்தமிழ்ச் சங்கம் பரவிட
எங்கள்குலம் எங்கும் உலவிட
குன்றில்உயர் குன்றில் உறைபவன்
..........................கதிர்காமன்!
பண்டைத்தமிழ் பண்ணில் இசைந்திட
அண்டைக்குலம் எல்லாம் அசந்திட
இன்றைக்கருள் செய்யக் குமரனைத்
............. .......தொழுவோமே!
கொச்சைத்தமிழ் எங்கும் களைந்திட
இச்சைக்குணம் இல்லா தொழிந்திட
அச்சன்குரு அன்புச் சரவணன்
....................அருள்வோனே!
....................அருள்வோனே!
............,.......அருள்வா..னே!
 

பல்லவி
ஆண்டாண்டு காலமாக ஆளுகின்ற சாமி... ஆளுகின்ற சாமி..
ஆலயத்தைத் தேடிவாறோம் ஆதரவா வாநீ...ஆதரவா வாநீ...

நல்லூரில் நாயகனா வாழுமெங்க சாமி....எங்ககந்த சாமி..
நாதியற்ற நம்மசனம் வாழவழி காமி
....வாழிவழி காமி..

கந்தனுக்கு அரோகரோ
முருகனுக்கு அரோகரோ
வேலனுக்கு அரோகரா
அழகனுக்கு அரோகரோ

வேல்முருகா வெற்றி வேல்முருகா ஓம்
வேல்முருகா வீர வேல்முருகா
 

சரணம் 1

கோடிநெஞ்சில் குடிகொண்ட
......... எங்கள் சண்முகா
நாடிவந்தோர் குறைதீர்க்கும்
...........ஆதி நாயகா
வேண்டிடுவோர் பிணிநீக்கும்
...........எங்கள் வேலவா
மீண்டிடவோர் வரம்வேண்டும்
..........ஞான பண்டிதா
ஞாலமெல்லாம் அருள்செய்யும்
...........எங்கள் குருபரா
ஞானமில்லார் மனம்மாற்றும்
..........ஞால பாலகா
காலமெல்லாம் புகழ்ஓங்கும்
..........சூர வேலவா
ஆசையில்லா நிலையின்றி
..........எம்மைக் காக்கவா

(வேல்முருகா...)
 

சரணம் 2

பழனியில் ஆண்டியான பாலகனே!
செந்தூரில் வென்றகிரு பாகரனே!
பரங்குன்றில் தெய்வயானை கொண்டவனே!
குருவாகி சுவாமிமலை நின்றவனே!
திருத்தணியில் வள்ளியினை ஏற்றவனே!
பழமுதிர்ச் சோலைவாழும் ஆண்டவனே!
எங்கள் நல்லூரை ஆளுகின்ற வேலவனே...
உங்கள் நல்லாசி வேண்டுகின்றோம் ஆண்டவனே...

(வேல்முருகா...)

அரோகரா... அரோகரா.... அரோகரா

செ. இராசா

நீலம்

முதன்மை நிறங்களில்
முக்கிய நிறமெனினும்;
நீலத்தை மட்டும்
மூன்றாம் நிறமென்பது
முற்றிலும் நிற அரசியலே...
(RGB)

எத்தனை நிறங்கள்
இங்கே இருந்தாலும்;
நீலத்தைமட்டும் சேர்த்து
நீலத் திரைப்படமென்பது
ஆபாசம்தரும் அருவெறுப்பே...

ஒன்று தெரியுமா?!

ஒவ்வொரு கோளுக்கும்
ஒவ்வொரு நிறமிருக்க
பூமிக்கு மட்டும்தான்
நீலநிறக் கோளென்ற
சிறப்புப் பெயர்!

இவ்வளவு ஏன்?
நீலவண்ணக் கண்ணாவென்றும்
நீலகண்டப் பெருமானென்றும்
கடவுள்களில்கூட நிறபேதமில்லை...
ஆனால்..
இந்த மனிதர்களில்தான்...
இன்னும்..
நீல மென்றால் அது பேதம்...

அட..
தேசியக்கொடியின் சக்கரம்கூட
நீல நிறம்தான்
ஆனால்...
கட்சிக்கொடிகளில் வரும் நீலம்தான்
கண்களை உறுத்துகிறது...

நீங்கள் என்னதான் கூறினாலும்
நீல வைரம் தான் மதிப்புமிக்கது...
நீலத் திமிங்கலம்தான் மிகப்பெரியது
நீல வானம்தான் மிக உயர்ந்தது
நீலக் கடல்தான் மிகப் பரந்தது...
ஆம்..
நீலம் நிரந்தரம்;
நீல நிறம் தரம்!

ஆயினும்...
நீலத்தைக் குறியீடாக்கி
சாதியத்தை பேசுவது
பா'ர்க்க ரஞ்சிதமாய் இல்லை!
போதும் பிரம்மாக்களே...
நிற அரசியலை விடுங்கள்...!!!
நிஜ அரசியலைத் தொடுங்கள்...!!!

செ. இராசா

நீயே என் பிரபஞ்சமடா...

 

நீ
கண்சிமிட்டும் போதெல்லாம்
எம் இதய வானிலே இடி மின்னல்...

நீ
புன்னகைக்கும் போதெல்லாம்
எம் உயிரை வருடும் இளந்தென்றல்..

நீ
உதடுகடிக்கும் போதெல்லாம்
என் உடலை நனைக்கும் மழைத்தூறல்..

நீ
மீசை தடவும் போதல்லாம்
என் ஆசை நதியில் பெருவெள்ளம்..

நீ
நெருங்கி வரும் போதெல்லாம்
நான் உன்னில் கரையும் ஓர் துளி..

ஆம்..
நீ...
நீ..
நீயே என் பிரபஞ்சமடா...

செ. இராசா

(இன்று இணையத்தில் ஓர் தலைப்பு பார்த்தேன். அந்தத் தலைப்பு #நீயே_என்_உலகமடா...அத்தலைப்பை சற்றே மாற்றி எழுதியுள்ளேன்)

அறுவடை காலம்

பொறுக்கின்ற காலம் பொறுத்திருந்தால் வாய்க்கும்
அறுவடை காலம் அறுப்பு

பத்தோடு பதினொன்னா

பத்தோடு பதினொன்னா வாழாதே- நீ
கெத்தோடு திமிறாம ஓடாதே!
இத்தோடு முடிவென்று பேசாதே- நீ
எத்தோடும் இணையாக்கி நோகாதே ...

எழுதாத கவிதைகளை எழுத வேண்டும்

 

எழுதாத கவிதைகளை எழுத வேண்டும்!

.....எழுதும்முன் மனதையது வருட வேண்டும்!

அழுகாத வருங்காலம் தோன்ற வேண்டும்!

.....அழுகும்முன் வருங்கவலைத் தீர வேண்டும்!

நழுவாத உறவுகளை நாட வேண்டும்!

.....நழுவும்முன் நகர்ந்துவிட எண்ண வேண்டும்!

முழுவாதத் திறன்பெருக பயில வேண்டும்!

...முழுவாழ்க்கை முடியும்முன் வாழ வேண்டும்!

 

செ. இராசா

தாய்மை

 

உன்மெய் உருவாக்க
....உண்மை இறையான
தன்மை குறையாத
.....தாய்மை;தாய்- அன்பே..மெய்
தன்னுள் இடம்தந்து
.....தன்வெண் புனல்தந்து
நின்னை வளர்க்கும்தாய் மெய்!

 செ. இராசா

(செப்பலோசையில் அமைகின்ற வெண்பாவை இசைப்பாடலாக மாற்ற நினைத்து எழுதியது

சங்கம்பல கண்டத்தமிழவள்

 #மெட்டு: #முத்தைத்திரு

சங்கம்பல கண்டத்தமிழவள்
எங்கும்தடம் என்றேபதிபவள்
தங்கம்;என மின்னும்மொழியவள் அறிவீரோ...

இன்னும்பல இன்னும்பலவென
இன்றும்புது மின்னல்பதிவென
என்றும்சுடர் எங்கும்ஒளியென
வருவாளே...

உள்ளம்கவர் உண்மைக்குறளவள்
பள்ளம்நிறை பச்சைத்தமிழவள்
கள்ளம்துளி இல்லாக்கவியவள்
தெளிவீரோ...

துள்ளல்பறை வெல்லும்பறையென
சொல்லும்படி துள்ளிக்குதித்திட
தெள்ளுத்தமிழ் செந்தேன்தமிழென
வருவாளே...

செ.இராசா

என்னை மட்டும் பிடிக்கலைன்னு சொல்லிப்புடாத

 பல்லவி
 

ஆண்
என்னை மட்டும் பிடிக்கலைன்னு சொல்லிப்புடாத- அடியே
கண்ணைக் கட்டி காட்டுக்குள்ள தள்ளிப்புடாத 

பெண்
உன்னை விட்டு விலகுவேன்னு நினைச்சுப்புடாத- அடநான்
முன்னைவிட்டு பாயும்வெடி மறந்துவிடாத‌‌..
 

ஆண்
தள்ளித் தள்ளிப் போகாம வாமா- இங்கே
உனக்காகக் காத்திருக்கேன் மாமா... 

பெண்
தள்ளி ஒன்னும் போகவில்லை ராசா- நீ
தட்டித் தூக்க நானிருக்கேன் லேசா
 

சரணம்_1 

ஆண்
அடியே அழகே நீதான்டி ஃபிகரு
பார்த்தா போதும் பத்திக்கும் ஃபயரு
கவியே கலையே உன்னோட லெவலு
அதிர வைக்கும் ஹைவோல்டேஜ் பவரு...
 

பெண்
அழகாப் பேசி வைக்காதே ஐசு
அசந்தா அள்ளி விடுவாயே லைய்சு
எதையும் நம்ப நானில்லை சைல்டு
ஏத்தி நீயும் போடாத வைடு..
 

ஆண்
உண்மை சொன்னா உருவாகும் டவுட்டு
என்ன சொன்னா அதுவாகும் ரைட்டு
ஹையோ ஹையோ வேணான்டி ஃபைட்டு
மெய்யோ பொய்யோ நான்இப்போ குயிட்டு
 

பெண்
உள்ள தெல்லாம் சொன்னாக்க மாமு
ஊரே நம்மை வைக்காதோ கண்ணு
கள்ள மில்லா உன்னோட பேச்சு
மீறிப் போனா அடிக்காதோ ஷாக்கு
 

ஆண்
தள்ளித் தள்ளிப் போகாம வாமா- இங்கே
உனக்காகக் காத்திருக்கேன் மாமா... 

பெண்
தள்ளி ஒன்னும் போகவில்லை ராசா- நீ
தட்டித் தூக்க நானிருக்கேன் லேசா

செ. இராசா

முத்தமிழில் எத்தமிழ்

முத்தமிழில் எத்தமிழ்தான் மூத்ததமிழ் என்பவரே..
முத்தமிழ்த்தாய் ஒன்றால்தான் மூன்று!

சாதியில்லை பேதமில்லை

 

சாதியில்லை பேதமில்லை

......சத்தியமாய் என்றபடி

நாதியற்ற கூட்டத்தின்

......நாயகன்போல்- வாதிடுவோர்

சாதியென்ன சாதியென்று ‌

......சப்தமின்றி கேட்டபடி

போதிக்கும் அத்தனையும்

......பொய்!

இயலாயென இசையாயென

இயலாயென இசையாயென
......இடையேசிலர் கிளம்ப
புயலாகவே அனலாகவே
......புனைந்தார்பலர் கதையே
இயல்பாகவே ஒலிதோன்றியே
......மொழிதோன்றிய தறிந்தும்
நயமாகவே அதைமாற்றியே
.....நவில்ந்தார்இயல் முதலே!

பலகாலமாய் பலபேர்களால்
...பதிவாகிய கவிகள்
நிலையாகிட ஒருகாரணம்
...நிசமாகவே அசையே..
சிலபேர்களின் மதியாளுமை
...சிறிதாகிட கவியின்
நிலைமாற்றியே புதிதாக்கிய
...வினையால்வரும் விளைவே...!

அசை;ஈரசை அதில்;ஓரிசை
...அதுதானிசைக் கவியே..
அசைமாற்றியே அசைமாற்றியே
...அமைத்தாரதை முறையே..
இசையாகவே இயல்பாகவே
...எடுத்தாண்டதன் வழியே
திசையாவிலும் தமிழா;தமிழ்
..சிறந்தோங்கிடும் மொழியே!

செ.இராசா

முத்துமலை முருகனுக்கு அரோகரா அரோகரா..‌

 

 

தொகையறா

 முத்துமலை முருகனுக்கு
அரோகரா அரோகரா..‌
முக்திதரும் கடவுளுக்கு
அரோகரா அரோகரா..
சக்திசிவ மைந்தனுக்கு
அரோகரா அரோகரா..
வெற்றிதரும் வேலனுக்கு
அரோகரா அரோகரா...

கந்தனுக்கு அரோகரா
கடம்பனுக்கு அரோகரா...
முருகனுக்கு அரோகரா
முதல்வனுக்கு அரோகரா...

வேல்முருகா...வெற்றி வேல்முருகா...
வேல்முருகா... வீர வேல்முருகா...
 

பல்லவி
வேல்வடிவ வீட்டினிலே
வீற்றிருக்கும் வேலவனே...(2)
பால்வடியும் முகங்காண
வாரோம்யா- எங்க
பாவத்தைக் களைஞ்சாலே போதும்யா..(2)

வேல்முருகா...வெற்றி வேல்முருகா...ஓம்
வேல்முருகா... வீர வேல்முருகா...
வேல்முருகா...வெற்றி வேல்முருகா...ஓம்
வேல்முருகா... வீர வேல்முருகா...
 

சரணம்_1
ஆறுபடை அத்தனையும்
ஐக்கியமாய் ஆனதுபோல்
ஏழுகோண வீடுகொண்ட
ஈசனோட திருமகனே..
இடக்கரம் வேலேந்தி
இடர்களினை துடைத்திடவே
வலக்கரம் ஆசிதர
வடிவெடித்தக் குலமகனே...

நீரில்லா ஊரினிலே
நீர்கொடுத்த நிலமகனே
நீரில்லா வாழ்வினிக்க
சாத்தியமோ?! சிவமகனே...
பாரெல்லாம் புகழ்மணக்கும் பைந்தமிழின் காவலனே
பூவெல்லாம் ஏங்குதய்யா
மாலையென மாறிடவே...

வேல்முருகா...வெற்றி வேல்முருகா...ஓம்
வேல்முருகா... வீர வேல்முருகா...
வேல்முருகா...வெற்றி வேல்முருகா...ஓம்
வேல்முருகா... வீர வேல்முருகா...
 

சரணம்_2
பத்துமலை முருகனைப்போய் பார்த்திடாத பக்தருக்கும்
முத்துமலை முருகனாக
உருவெடுத்த வடிவழகே
நித்தநித்தம் கடன்சுமையால்
வாடுகின்ற அன்பர்களின்
வேதனைய நீக்கவந்த
நேசமுள்ள இறையுருவே..

பிள்ளைவரம் வேண்டிவரும் எத்தனையோ பேர்களுக்கு
பிள்ளையென மாறிவரும்
பேரருளே.. பெருங்கடலே..
இல்லையென சொல்லுகின்ற எத்தனையோ பேர்களையும்
இல்லையென்ன இல்லையென சொல்லவைக்கும் அருள்மழையே...

வேல்முருகா...வெற்றி வேல்முருகா...ஓம்
வேல்முருகா... வீர வேல்முருகா...
வேல்முருகா...வெற்றி வேல்முருகா...ஓம்
வேல்முருகா... வீர வேல்முருகா...

செ. இராசா

இயலா இசையா? வெண்பாக்கள்

இயல்முதலா? இல்லை இசைமுதலா? என்றால்
இயற்கையின் தோற்றம் இசை!
(1)

பிக்பாங் பெருவெடிப்பின் பேரிசை இல்லையேல்
எக்கோளில் நாமிருப்போம் இங்கு?
(2)

ஓமென்ற ஓசை உலகத்தின் ஆதியாய்
ஆமென் எனச்சொல்வர் ஆய்ந்து!
(3)

ஓசையின் ஓரொழுங்கில் உண்டான கட்டமைப்பைப்
பாஷை எனசொல்வர் பார்
(4)

ஒலிவழி வந்தமைந்த ஒவ்வோர் மொழிக்கும்
ஒலிவரி தோற்றங்கள் உண்டு
(5)

வரிவடிவ மாற்றங்கள் வந்தாலும் நம்மில்
பெரியளவில் மாறா ஒலி
(6)

எழுப்புகின்ற ஓசை எழுத்துரு வாகி
எழுத்துருவைப் பாடல் இசை!
(7)

இசைக்குள் இசையும் இயல்புள்ள சொல்லால்
இசையும் மெருகேறும் இங்கு!
(8)

சொற்றொடர் இன்றியும் தோற்றிடலாம் என்றாலும்
நிற்காது பாடல் நிலைத்து!
(9)

இயலினிதா? இல்லை இசையினிதா? என்றால்
இயலிசை சேர்ந்தால் இனிது!
(10)

செ. இராசா

உழைப்பாளர் தினம்

பல்லவி
எட்டுமணி நேர உரிமை இங்கே எவருக்கும் கிடைக்கணுங்க
சட்டப்படி ஆக்கும் கடமை நம்ம
அரசுக்கும் இருக்குதுங்க..

உழைப்பவர் அனைவரும் உயரணும்- இதை
உணர்ந்தவர் தலைவரா அமரணும் (2)

எட்டுமணி நேர உரிமை இங்கே எவருக்கும் கிடைக்கணுங்க
சட்டப்படி ஆக்கும் கடமை நம்ம
அரசுக்கும் இருக்குதுங்க..
 

சரணம்
ஜவுளிக் கடையிலும்
ஹோட்டல் பணியிலும்
மளிகைக் கடையிலும்
மால்கள் முழுவதும்
காபிக் கடையிலும்
காவல் பணியிலும்
ரோட்டுக் கடையிலும்
டியூட்டி முழுவதும்
எத்தனை பேருங்க நிக்கிறாங்க?
எவ்வளவு நேரமா நிக்கிறாங்க?
யாருங்க OTக்கு கொடுக்கிறாங்க அட
யாருங்க உண்மையா இருக்குறாங்க.‌

உழைப்பவர் அனைவரும் உயரணும்- இதை
உணர்ந்தவர் தலைவரா அமரணும்!

செ. இராசா