ஆணோ பெண்ணோ முன்பெல்லாம் திருமணமான பிறகுதான் உடலின் எடை கூடும். ஆனால் இப்போதோ சொல்லவே வேண்டாம். உலகில் கிடைக்கும் அனைத்து வகையான உணவையும் எப்போது வேண்டுமானாலும் ஒரு பிடிபிடிப்பதாலும், அறிவியல் கண்டுபிடிப்புகள் பெருகி உடல் உழைப்பு குறைந்து போனதாலும் சிறியவர்முதல் பெரியவர்கள்வரை அனைவருக்கும் உடல் எடை கூடிவிடுகிறது. இதில் என்ன வேடிக்கை என்றால், கூடிக்கொண்டே போகும் உடல் எடைப்பற்றி வேறு யாரேனும் சுட்டிக்காட்டும் போதுதான் அது பலருக்கும் தெரிய வருகிறது.
அதிலும் வளைகுடா போன்ற வெளி நாடுகளுக்குச் செல்லும் பலருக்கும் போன சில வருடங்களில் சம்பளம் கூடுகிறதோ இல்லையோ அவர்களின் உடல் எடை அநியாயத்திற்கு கூடி விடுகிறது. அப்படி கூடியபின் அவர்கள் சந்திக்கும் உடல் சார்ந்த மற்றும் உளம் சார்ந்த பிரச்சனைகள் கொஞ்சம் நஞ்சமல்ல. அதுவும் குறிப்பாக திருமணம் ஆகுவதற்குமுன் உடல் எடைபோட்டால் அதைக் குறைக்க என்னதான் மாங்கு மாங்கென்று நடையாய் நடந்தாலும் காலணிகள் சிறுத்த அளவுகூட உடல் சிறுக்காமல் அவர்கள் படும் வேதனை இருக்கிறதே....அப்பப்பா சொல்லிமாளாது.
இதுபோக, இதைக்குடித்தால் சரியாகிவிடும் அதைச்சாப்பிட்டால் சரியாகிவிடும் என்று பலரும் பல மருத்துவ யோசனைகளை அள்ளிப்போட்டு, அதை அத்தனையையும் ஒன்று விடாமல் செய்து பார்த்து நொந்து போனவர்கள்தான் இங்கு ஏராளம். அப்படி நொந்து நூடுல்ஸானவர்களின் நானும் ஒருவனாகதான் இருந்தேன். ஒரு கட்டத்தில் எப்படி நானாக "என் வழி தனி வழியென்று" உடம்பைக் குறைத்தேனோ அந்த வழியை அனைவருக்கும் பகிரலாமே என்கிற நல்ல நோக்கத்தில் தான் இக்கட்டுரையை எழுதுகின்றேன். இது சம்பந்தமாக ஏற்கனவே கத்தார் மனவளக்கலை மன்றத்தில் சிறப்புரை ஆற்றி இருந்தாலும் அதை எழுத்துப் பூர்வமாக ஆவணப்படுத்துவோமே என்கிற எண்ணத்தில்தான் இக்கட்டுரைத் தொடரை எழுத நினைக்கின்றேன்.
இங்கே என்னை நானே இரண்டுமுறை பரிசோதித்துப் பார்த்துள்ளமையாலும், இதே முறையில் என் மனைவியும் உடம்பைக் குறைத்துள்ளதாலும் இந்த முறையை அனைவரும் பின்பற்றலாம் என்று மனப்பூர்வமாக அனைவருக்கும் சிபாரிசு செய்கின்றேன். இக்கட்டுரையின் முடிவில் "எளிய முறையில் உடம்பைக் குறைப்பது எப்படி?" என்பதைத் தெரிந்துகொள்வதால் அதையே இக்கட்டுரைக்கு தலைப்பாக்கியுள்ளேன்.
வாருங்கள் கட்டுரைக்குள் நுழைவோம்....
செ. இராசமாணிக்கம்
No comments:
Post a Comment