நான்

நானிருக்கும் போதெல்லாம்
....நாமொன்றும் செய்வதில்லை
நானின்றிப் போனால்தான்
....நாம்செய்வோம்- நானிலத்தில்
நானிருக்கச் செய்தாலும்
....நன்றாகா என்றறிந்து
நானின்றிச் செய்வீர்கள்
....நன்கு!

செ. இராசா

அழுத்தம்

 
அழுத்தம் என்னும் பேராற்றல்தான்
இந்த மொத்தப் பிரபஞ்சத்தின்
மூல விசை!
அழுத்தம் என்னும் ஓராற்றல்தான்
இந்த உள்ளப் பிரளயத்தின்
உந்து விசை!

இரு விரல்களின் உராய்வில்
சொடக்கு வருவதற்கும்
இரு உடல்களின் உராய்வில்
ஜனனம் வருவதற்கும்
மூல காரணம் ஒன்றுதான்
அது; அழுத்த விசையே...!

சின்னப் பம்பரம் சுழல்வதற்கும்
பெரிய கோள்கள் சுழல்வதற்குமே
மூல காரணம் ஒன்றுதான்
அதுவும்; அழுத்த விசையே..!

அழுத்தம்
குறைந்தாலும் ஆபத்து
கூடினாலும் ஆபத்து
சந்தேகமெனில்
பீபி(BP) உள்ளவர்களிடம் கேளுங்கள்!

அழுத்தம்
இருந்தாலும் பிடிக்காது
இல்லையென்றாலும் ருசிக்காது
சந்தேகமெனில்
ஐடி(IT) பணியாளர்களிடம் கேளுங்கள்!

ஆழம் அதிகரித்தால்
அழுத்தம் அதிகரிக்கும்
இது அறிவியல்...

ஆழம் அதிகரித்தால்
அழுத்தம் குறையும்
இது ஆன்மீகம்..

எனில் அழுத்தம் சரியா? தவறா?

தரிசான மனத்தை உழுது
வளமான மனமாக்கினால்
அழுத்தம் சரியே...
அழகான மனத்தைக் அழுத்தி
அழுக்கான மனமாக்கினால்
அழுத்தம் தவறே...

கரி பிடித்த சட்டியை
அழுத்தித் தேய்த்தால்தான்
சுத்தமாகும்!
அஃதே..
வினை பிடித்த சிருஷ்டியை
அழுத்தி நீக்கினால்தான்
சுத்தமாகும்...

பூனை யானைமேல் நடப்பதும்
யானை பூனைமேல் நடப்பதும்
ஒன்றாகாதுதான்....ஆனால்
என்றோ நடந்த ஒன்றை
எப்போதும் அசைபோட்டால்
பூபோன்ற அழுத்தமும்
பூகம்ப அழுத்தமாகலாம்..
ஜாக்கிரதை..
அழுத்தம்
இடம்பொறுத்தும் மாறும்..
பொருள்பொறுத்தும் மாறும்...

முள்ளை முள்ளால் எடுப்பதுபோல்
அழுத்தத்தை அழுத்தியே எடுக்கலாம்
முயன்று பாருங்கள்...!!!

அழுத்தம் அழகாக்கும்
அந்த இஸ்திரி பெட்டியைப்போல்!
அழுத்தம் அழகாகும்
இதோ இந்தக் கவிதையைப்போல்!

செ. இராசா

ஒன்றில் இருந்து பத்துவரை

ஒருமுறை கிடைப்பதே
.........வாழ்க்கையடா- அதை
உணர்ந்து கொண்டாலே போதுமடா!
இருமனம் இணைவதில்
.........இன்பமடா- அதில்
பிறந்திடும் பிள்ளைகள் செல்வமடா!

மூன்று கர்மங்கள்
....உள்ளதடா- அதன்
முறையினில் தெளிவதே ஞானமடா!
நான்கு தர்மங்கள்
.....இருக்குதடா- அதில்
நான்கிலும் மகிழ்பவன் ஞானியடா!

ஐந்து பூதமே
....உலகமடா- உன்
ஐம்புலன் அட(க்)ங்குதல் வெற்றியடா!
ஐந்திற்கு மேலே
.....ஆறறிவே- நல்
அறமின்றிப் போனால் பேரிழிவே!

ஏழாம் தலைமுறை
......வாழ்ந்திடவும்- நாம்
இயற்கையைக் காப்பது
நியாயமன்றோ?!
பாழாய்ப் போவதைத்
......தடுப்பதொன்றும்- ஒரு
எட்டாக் கனியோ?! இல்லையன்றோ?!

ஒன்பது துவார
....ஊனுள்ளே- உயிர்
உலவிட படைத்ததும் அவன்றோ?
என்றும் அவனை
.....நினைந்திருந்தால்- உயர்
பத்தும் பறந்து வருமன்றோ!!

செ. இராசா

வாரா வாரம்

 

வாரா வாரம் எப்பொழுதும்
....வருவோம் கடற்கரை மீன்பிடிக்க!
வாரா வாரம் என்பதெல்லாம்
....வந்ததே இல்லை என்பதுபோல்
வாரா மீன்கள் அத்தனையும்
....வருதே வருதே என்றுசொல்லி
தீரா ஆசையில் எப்பொழுதும்
....திரும்பி வருவோம் மீன்பிடித்தே!

பிடித்த மீன்களை வீடுவந்து
..பிரித்து விடுவோம் வகைவகையாய்
பிடித்த வகையில் ஓர்பங்கை
..பிரியமாய் சமைக்க மனம்வைத்தே
தடித்த மீனைக் கழுவுகையில்
..சடக்கென செதில்கை இறங்கியதே
முடிந்த வரையும் முயன்றாலும்
...வரவே இல்லை செதில்வெளியே!

என்ன ஆகும் எனநினைந்தே
...இருந்தே விட்டேன் சிலமாதம்!
இன்னல் கொஞ்சம் இருந்தாலும்
...இருந்தேன் அதுயென் பிடிவாதம்!
என்னதான் உள்ளே என்றறிய
...எடுத்தேன் முடிவை ஒருவழியாய்!
சின்ன செதில்தான் இருப்பதினால்
...திறப்பதா? விடுவதா? முடிவெனதே!

செ. இராசா

ஐந்துபூத மொன்றுசேர

ஐந்துபூத மொன்றுசேர
.......ஆனதிந்த உருவமே!
ஐந்துஞானப் பொறிகளாலே
.......ஆனதிந்த உடலுமே!
ஐந்தின்மாத் திரைகளாலே
.......ஆனதிந்த உணர்வுமே!
ஐந்தையா(ரு)வு மறிவதாலே
.......ஆதியர்த்தம் தெரியுமே!

ப்லா... ப்லா... பலா....

 

(சிறுவர்களுக்கான பாடல்)

 

பல்லவி

ஏன்டி இப்படி பண்ணுற?

எதுக்கு இப்படி பண்ணுற?

கேட்டாக்க நீ சொல்லுற..

ப்லா... ப்லா... பலா....

ப்லா... ப்லா... பலா...

ஏன்டா இப்படி பண்ணுற?

எதுக்கு இப்படி பண்ணுற?

கேட்டாக்க நீ சொல்லுற...

 

ப்லா... ப்லா... பலா....

ப்லா... ப்லா... பலா...

 

சரணம் 1

யாரும் வீட்டுக்கு வந்தாக்க

வாங்கனு சொல்ல மாட்டீங்க...

வாயத் தொறந்து பேசுங்கன்னா

பேசக் கூட மாட்டீங்க...

கடைக்குப் போக சொன்னாக்க

அதுக்குப் போக மாட்டீங்க..

தனக்கு மட்டும் வேலையின்னா

உடனே கிளம்பிப் போவீங்க..

(....ஏன்டி)

 

ப்லா... ப்லா... பலா....

ப்லா... ப்லா... பலா...

 

சரணம் 2

உறவு முறைய சொல்லுனாக்க

முறைச்சு முறைச்சு பாப்பீங்க..

ஒட்டிப் பிறந்த உடன்பிறப்ப

எதிரிபோல நினைப்பீங்க..

உதவியேதும் கேட்டாக்க

டயமே இல்லைன்னு சொல்வீங்க..

இருக்கும் நேரம் அத்தனையும்

நெட்டக் காலி செய்வீங்க...

(....ஏன்டி)

 

ப்லா... ப்லா... பலா....

ப்லா... ப்லா... பலா...

செ. இராசா

வாழ்ந்தா...- இப்படி
வாழ்ந்தான்னு சொல்லனும்!
வாழ்ந்தால்- அப்படி
வாழ்வாங்கு வாழனும்

எந்தத் துறையெடுத்தா

 

எந்தத் துறையெடுத்தா

......என்ன கிடைக்குமென்று

சிந்திச்சு பார்த்துதான்

.....சேருறான்?- விந்தையாய்

கற்றத விட்டுட்டு

.....காசுக்காய் ஐடி(IT)யென்றால்

மற்றதற்(கு) என்னயிங்கே

.....வாழ்வு?!

எதிர்பார்க்கும் இலக்கொன்றை

 

மனமே மனமே மனமே மனமே

மனமே மனமே மனமே மனமே 

 

எதிர்பார்க்கும் இலக்கொன்றை

எதிர்நோக்கும்போதே

எதிரான கருத்தாலே

ஏமாற்றம் ஆகும்!

 

எதிர்காலக் கணக்கொன்றில்

நிலையாகும்போதே

எதிர்பார்க்கும் இலக்கென்றும்

எளிதாகக் கூடும்!

 

நம்பு நம்பு... நம்பினால் உண்டு

நம்பு நம்பு... நீ முதல் நம்பு!

 

செ. இராசா

குடியால்வரும் நிதிவேண்டிடும்

குடியால்வரும் நிதிவேண்டிடும்
......குடியாட்சியின் கொள்கை
குடிகூட்டியே நிதிகூட்டிடும்
......கொலைபாதகக் கொள்ளை!

குடியால்வரும் படுபாதகம்
......குறையாதிடா போதும்
குடிமூடிட முடியாதென
......குடியாளுமைக் கூறும்!

குடிபாரென குடிஊற்றியே
......கொடுப்பாரவர் வாழ..
குடிபோதையில் குடியேற்றியே
.......மிதப்பாரிவர் சாக..

குடியேபிணி அதுவேசனி
........அறியாமலே வீழ்ந்தோம்
குடியாலினி வருமோர்நிதி
........இனியாயினும் வேண்டாம்!

செ. இராசா

ஆண்டுகள் ஓடியும்

ஆண்டுகள் ஓடியும்
....ஆயுளைத் தாண்டியும்
.......ஆனது யாது தாயே?
ஊண்மிகை உண்டதும்
....ஊழ்வினை தீர்ந்ததும்
....ஓய்ந்ததே வாழ்வு தாயே?!
மீண்டுமோர் வாழ்வென
.....மீண்டுமோர் வாழ்வினி
.......வேண்டிட மாட்டேன் தாயே!
வேண்டுவேன் ஓர்வரம்
.....வெற்றியைக் கோரியே
..........வேதனை தீரும் தாயே!

பாரதம் தாண்டியும்
....பாக்களை ஏற்றிய
.......பாவலன் யாரு தாயே?
பா-ரதம் ஓட்டியப்
.....பாரதி போயினும்
.......பாமகன் உண்டு தாயே!
மா-ரதம் வாங்கிடும்
....மாபெரும் ஆசைகள்
......வந்ததே இல்லை தாயே!
பூரதம் போலொரு
....என்னரும் செந்தமிழ்
.......என்னையும் தாங்கு(ம்) தாயே!

பற்றினை நீக்கிடப்
....பற்றினேன் உன்னையே
......பற்றிலான் ஆக்கு தாயே!
கற்றிடும் ஆசையில்
...கற்றிடக் கற்றிடக்
......கற்றிலேன் ஆனேன் தாயே!
உற்றவர் யாரென
....உற்றுநான் நோக்கையில்
......வெற்றிடம் அங்கு தாயே!
வற்றிடும் போதிலும்
.......நற்றவம் செய்கிறேன்
........ அற்புதம் செய்யு(ம்) தாயே!

செ. இராசா

சிறுசிறு பிரச்சினையை

சிறுசிறு பிரச்சினையை
...சிந்தனையில் ஏற்றாமல்
......சீக்கிரமே ஏறி வருவாய்!

சிறுமதி படைத்தோரை
...எள்ளளவும் எண்ணாமல்
.‌.....தீர்க்கமுற ஓர்ந்து தெளிவாய்!

மறுமுறை விழுந்தாலும்
...நம்பிக்கை வீழாமல்
.....நாயகனாய் மீண்டும் எழுவாய்!

பெறுமதி குறையுமெனில்
...பேரளவில் பேசாமல்
......பின்வாங்கி முன்னர் விரைவாய்!

செ. இராசா

அமைதி

பெண் பார்க்கும் படலத்தில்
அமைதி என்றால்
சம்மதம் என்று அர்த்தம்!

போர்புரியும் தருணத்தில்
அமைதி என்றால்
சமாதானம் என்று அர்த்தம்!

ஆர்ப்பரிக்கும் அலைகள்
ஆழ்கடலில் அமைதியுறும்!
ஆர்ப்பரிக்கும் தலைகள்
ஆடி முடிந்தால் அடங்கிவிடும்!

வெந்த பூரியில்
சப்தம் வருவதில்லை; அஃதே
அமைதிப் பூங்காவில்
இரைச்சல் இருப்பதில்லை....

இருளின் அமைதியை
ஒளி கிழிக்க லாம்
ஆனால் காயப்படுத்துமா என்ன?

உலக அமைதிதான்
ஐநாவின் இலக்கு;
ஆனால் பாவம்
அமைதிதான் அங்கே
விதி விலக்கு!

உலக அமைதிதான்
மகரிஷியின் இலக்கும்
ஆனால்
தனிமனித அமைதியே
அதற்கான விளக்கு!

ஒன்றைப் புரிந்துகொள்ளுங்கள் !

கண்மூடி இருப்பவரெல்லாம்
அமைதியாய் இருப்பதாய் அர்த்தமில்லை...
அவர்கள் மனத்திரைக்குள்
ஆயிரம் படம் ஓடலாம்...

அஃதே
கண்திறந்து இருப்பவரெல்லாம்
விழிப்பு நிலையில் இருப்பதாகவும்
அர்த்தமில்லை
சில பள்ளி மாணவர்கள்போல்
விழித்தும் உறங்கலாம்!

அமைதி என்பது
புலன் சார்ந்ததோ
இடம் சார்ந்ததோ அல்ல
அது; முற்றிலும்
அகம் சார்ந்ததே..!!

ஆம்...
அகம் திறந்தால்
சமாதிநிலை ஆகும்
அகம் கொதித்தால்...?
சமாதியே நிலையாகும்!

அமைதி! அமைதி!! அமைதி!!!

செ. இராசா

கள்ளக்குறிச்சி

 

கள்ளக்குறிச்சி

கள்ளுக் குறிச்சியானதாம்; ஆமாம்

கள்ளக்குறிச்சி மட்டுமா ஆனது?

இது ஏதோ

திடீரென்று நடந்ததாய்

தீர்வுரை எழுதி விடாதீர்?

எப்போதும் நடக்கிறது

இப்போது தெரிகிறது

அவ்வளவே...

 

ஒவ்வொரு முறையும்

ஒவ்வொரு ஆட்சி; ஆனால்

எல்லா முறையும் ஒரே காட்சி....

ஆமாம்...

இதற்கு யார் காரணம்?

குடித்த நபர்களா; இல்லை

கொடுத்த நபர்களா?!

கண்டுகொள்ளா காவல்துறையா? இல்லை

காட்சிபடுத்தா ஊடகத்துறையா?

நாடகம்போடும் அரசாங்கமா? இல்லை

வேடம்போடும் எதிர்க்கட்சிகளா?

 

ஒன்றைக் கூறுங்கள்?

நாட்டுச்சாராயம் தவறென்றால்: தமிழ்

நாட்டுச்சாராயம் (TASMAC) சரியா?

அந்தச் சாராயத்தில் மரணமென்றால்

இந்தச் சாராயத்தில் இல்லையா?!

ஒருவேளை..

இந்தச் சாராயம் விலை குறைந்திருந்தால்

அந்தச் சாராயம் வந்திருக்காதோ?!

 

ஆமாம்....

எது நல்ல சாராயம்?

அரசாங்கமே விற்கும் சாராயமா?

ஆனாலும்;

திருட்டு மாங்காய்க்கே

மவுசு அதிகம்போல;

அட..

சும்மாவா

செத்தாலும் பத்துலெட்சமாம்...!!!

அப்புறமென்ன?

 

ம்ம்... சொல்லுங்க...

நாங்கள் மீண்டும் ஆட்சிக்கு வந்தால்

சாராயத்தை ஓழித்தே தீருவோம்!

 

செ. இராசா

#சாராயம்

#TASMAC: Tamil Nadu State Marketing Corporation Limited

கொட்டாத கொட்டடி கொட்டி

 

கொட்டாத கொட்டடி கொட்டி
தட்டாத தாளமுந் தட்டி
எட்டாத மேடையும் எட்டி
..............வெற்றியத் தட்டு...டும் டும்!

காக்கின்ற தெய்வம் போற்றி
வார்க்கின்ற ஆசான் போற்றி
பார்க்கின்ற பெற்றோர் போற்றி
............சொல்லிடு போற்றி...டும் டும்!

ஐம்பூதம் எல்லாம் போற்றி
அறவேதம் எல்லாம் போற்றி
தமிழ்நாதம் எல்லாம் போற்றி
..........சொல்லிடு போற்றி...டும் டும்!

எளியோரும் வாழ்ந்திட வேண்டி
வலியோராய் மாறிட வேண்டி
மொழிவோமே கொட்டடி கொட்டி
.......கொட்டடி கொட்டி...டும் டும்
.......கொட்டடி கொட்டி...டும் டும்
.......கொட்டடி கொட்டி....டும் டும்.

செ.‌இராசா

மதராஸ் வெண்பா

அவகோடோ ஜூஸைப்போல்
.....அம்சமா கீற
அவதான்டா என்னோட
.....ஆளு- மவனே
அவளாட்டம் யாராச்சும்
.....ஆக்டேதும் செஞ்ச
அவளோதான் விட்டுவிடும்
......அள்ளு!

செ. இராசா

பிரைட்டக்_கூட்டுனா நீ ஃபிகராத் தெரியுற

 தொகையறா
சொம்மா பார்க்க சொல்ல
சொமாராத்தான் கீறா.. ஆனால்
டீபி ஸ்டேடஸ் குள்ள
என்னாமா....வாறா

ப்ரைட்டோ... டார்க்கோ..
ஹைட்டோ...சார்டோ...
என் பியூட்சர் சகிநீ
என் வதைநீ...
இல்லை தேவதைநீ
ஆ..ஆ...ஆங்...
 

பல்லவி 

பிரைட்டக் கூட்டுனா நீ ஃபிகராத் தெரியுற
டார்க் மோடுல செம்ம மாசு காட்டுற
ஸ்டேடஸ் மாத்தியே என் பீப்பி ஏத்துற
ஹார்ட்டு பீட்டுல லவ் சாங்கு பாடுற

வாவ் வாவ் வாவ் அந்தப் பிரம்மன் எங்கடி?
வா வா வா அவன் காலைக் காட்டடி...

யோவ் யோவ் யோவ் நீ பெரிய ஆளுய்யா
நோ நோ நோ நீ அதுக்கும் மேலய்யா
 

சரணம் 1
உன்னை பார்க்கசொல்ல பத்திக்கும் ஃபயரு
கிட்ட நெருங்கிவந்தா ஸ்பீடாகும் கியரு
லிப்ஸ்டிக் இல்லாத அட்ராக்டிவ் லிப்சு
தாறு மாறாச்சு என்னோட பல்சு

ஐஸில் நீபேசும் டிகோடிங் வேர்ட்சு
ஐப்ரோ சிறகாடும் அழகான பேர்ட்ஸ்
கையால் நீசுத்தும் உன்கர்லிங் ஹேர்சு..
ஐயோ... அதுதாண்டி உசுப்பேத்தும் வாட்சு...
வா சகியே வா...என் வாசகியா வா
தீ யெனவே வா...என் தேவதையா வா

(வாவ் வாவ் வாவ்)
 

சரணம் 2
முன்னே போகசொல்ல உன்னோட ஃபிகரு
சுண்டி இழுக்குதடி...என்னாடி பவரு?!
கண்ணை மூடசொல்ல அப்போதுன் நினைப்பு
என்னைக் கெடுக்குதடி... என்னாகும் பொழப்பு?

சம்மர் ஹாட்டெல்லாம் ஹாட்டாடி யம்மா...
எம்மாம் ஹாட்டெல்லாம் ஓமுன்னே சொம்மா..
லிக்கர் கிக்வேணாம் நீபோதும் மைமா
சிக்சர் தூள்பறக்கும் என்னோட வாமா!

வா சகியே வா...என் வாசகியா வா
தீ யெனவே வா...என் தேவதையா வா

(வாவ் வாவ் வாவ்)

செ. இராசா

எண்ணியது கிட்டும் இயங்கு!

  

நேரிசை வெண்பா
என்னதான் செய்தாலும்
......ஏதுமிங்கே ஆவதில்லை
என்னதான் செய்யயினி?!
......என்பவர்கள்- புன்னகைத்தே
என்னதான் இன்னுமென
......என்றும் நடைபோட்டால்
எண்ணியது கிட்டும்
......இயங்கு!

செ. இராசா

நீண்ட நாட்கள் இல்லை இல்லை பல வருடங்களுக்குப்பிறகு எம் கோரிக்கையை நிறைவேற்றிய இறைவனுக்கு எம் இனிய மனமார்ந்த நன்றி

S

 

வெற்றிக்கொடி கட்டிப் பறந்திட
முற்றும்இடர் விட்டுத் துறந்திட
கற்றுக்கொடு பற்றில் விடுபட வடிவேலா....

குற்றம்குறை இல்லா தொழிந்திட
சுற்றம்நிறை என்றே முழங்கிட
நிற்கும்படி எம்மை நடத்திடு வடிவேலா‌....

இன்னல்இனி இல்லை எனும்படி
இன்பச்சுடர் எங்கும் படர்ந்திட
அன்பில்;அருள் ஐயா வழங்கிட வருவாயோ..

செல்லும்:இடம் எங்கும் சிறந்திட
வெல்லும்:ஒலி எங்கும் இசைந்திட
நல்லோர்வழி சென்றே கடந்திட
அருள்வாயோ...

செ. இராசா

மனம் படும்பாடு

இன்னிசைக் கலிவெண்பா

இருக்கிற ஒன்றை எளிதாய்க் கருதும்
இருப்பது போனால் இழந்ததை எண்ணும்
வருகிற தென்றால் மகிழ்ந்து மலரும்
வருவது நின்றால் வருந்தித் திரியும்

ஒருஇடம் விட்டே ஒருஇடம் தாவும்
ஒருஇடம் நின்றே உறங்க மறுக்கும்
விரும்பிடும் ஒன்றை வெறுத்திட வைக்கும்
திரும்பவும் வந்தே திரும்பவும் தீண்டும்

கரும்பையும் கூடக் கசந்திட வைக்கும்
இரும்பையும் கூட இலகுவாய் எண்ணும்
அருமை எனவே அருகினில் செல்லும்
எருமை எனவே இகழவும் செய்யும்

பெருமை மிகவே பிறவுயிர் போற்றும்
உரிமை மிகவே உணவென உண்ணும்
இருமை அறிய இறையினை நாடி
ஒருமையில் போகும் உளம்!

செ. இராசா

 

மூன்றாம் முறையாக முன்னேறி வந்தவர்க்கு

மாண்புடன் யாம்கூறும் வாழ்த்து!

எங்கே தேடுவேன்?- இறைவனை

எங்கே தேடுவேன்?- இறைவனை
எங்கே தேடுவேன்?!

சின்ன வயதில்
அன்னை சொன்ன
கண்ணைக் குத்தும் சாமி எங்கே?!
சிந்தை உயர
தந்தை சொன்ன
நம்மைக் காக்கும் சாமி எங்கே?!

கல்லில் உண்டா?
சொல்லில் உண்டா?
உள்ளதெங்கே தேடுகின்றேன்....
விண்ணில் உண்டா?
மண்ணில் உண்டா?
உண்மைதேடி ஓடுகின்றேன்...

எங்கே தேடுவேன்?- இறைவனை
எங்கே தேடுவேன்?!

இருக்குன்னு சொன்னா ஆத்திகம்
இல்லைன்னு சொன்னா நாத்திகம்
இருக்கு இல்லை
இல்லை இருக்கு
இப்படிப் புலம்புனா பைத்தியம்

எங்கே தேடுவேன்?- இறைவனை
எங்கே தேடுவேன்?!

கண்ணை மூடி
தன்னுள் ஓடி
கண்டு கொள்ள வேண்டும் என்றே
நன்றே கூறி
அன்றே ஓதி
சென்ற கோடி சித்தர்கள் உண்டே..

மார்க்கம் காட்டி
மாற்றம் காட்டி
வாழ்ந்தும் காட்டிய மாந்தர் என்றே
போற்றிப் பாடி
பூக்கள் தூவி
வாழ்த்தும் கோடி சீடரும் உண்டே...

இருந்தும்...
எங்கே தேடுவேன்?- இறைவனை
எங்கே தேடுவேன்?!

உருவத்தில் காணும் ஒருமதம்
அருவத்தில் காணும் மறுமதம்
உருவமா அருவமா
அருவுரு வடிவமா
எவ்வுரு வாயினும் சம்மதம்....

எங்கே தேடுவேன்?- இறைவனை
எங்கே தேடுவேன்?!

செ. இராசா

முத்தமிழ் வேந்தர்க்கெம் வாழ்த்து

 

வெண்டளையில் பேசென்று

........வேண்டுகின்ற பாவலரை

கண்டதில்லை என்றாலும்

.......கண்டுகொண்டேன்- தண்டமிழால்

அத்தனை பேர்களையும்

.......அன்புடன் சேர்த்துவைத்த

முத்தமிழ் வேந்தர்க்கெம்

........வாழ்த்து!

 

செ‌ இராசா

பேசுபொருள்

 

பேசுபொருள் ஆகத்தான்

.....பேசுகிறார் என்றறியார்

பேசுபொருள் பற்றியே

......பேசுகையில்- பேசுவதால்

பேசுபொருள் ஆக்கியவர்

......பேருவகை ஆகின்றார்

பேசுபொருள் யாதுணர்ந்து

......பேசு!

 

செ. இராசா

விருது விருது விருது

 

விருது விருது விருது
கொடுக்குறாங்க விருது
வருது வருது வருது
நீ வந்தா...இங்கே விருது

கூட்டம் சேர்க்க கூப்பாடு போட்டு
கூவிக்கூவி குடுப்பாங்க விருது
நாட்டம் காட்டி நம்மோட ஆளு
வாரமானா வருவாங்க பாரு

எதுக்கு எதுக்கு எதுக்கு- இந்த
பொழப்பு எல்லாம் எதுக்கு?
ஒதுக்கு ஒதுக்கு ஒதுக்கு- உன்னை
செதுக்க நேரம் ஒதுக்கு!

அப்பப் பாரு உன்னோட விருது
உன்னைத் தேடி ஓடோடி வருது!
அப்பக்கூட இல்லைன்னா விருது
விருது என்ன.........ன்னு கருது!

செ. இராசா

பிறந்தநாள் பாட்டு (பொதுவான பாடல்)

பேரின்ப வாழ்வே வாழ்க
பேரின்ப வாழ்வே வாழ்க

பூமிக்கு வந்த நாள்..
.....பூமிக்கு வந்த நாள்!
புத்தாடை ஏதுமின்றி
.... பூமிக்கு வந்தநாள்!
ஈரைந்து மாதங்களாய்
.... ஈரத்தில் மூழ்கியே
பாரினைக் காணவேண்டி
....பாய்ந்தோடி வந்தநாள்

கண்ணே மணியே சிட்டே
ஏ பட்டே...என் செல்லம்
அழகே அமுதே அன்பே
ஏ..அறிவே..என் சாமி
உலலலலலலலா...ங்கு
உலலலலலலலா...ங்கு
என் செல்லம் செல்லம் செல்லம்
என் சாமி சாமி சாமி

சாதிக்க வந்த நாள்
....சாதிக்க வந்த நாள்
தாய்தந்தை மூலமாக
...சாதித்தே வந்த நாள்
வையகம் பேரைச்சொல்ல
...வாழ்வதே வாழ்க்கையென
மெய்யெனும் ஞானம்பெற
...வாழ்த்துவோம் வாங்களேன்..

பேரின்ப வாழ்வே வாழ்க
பேரின்ப வாழ்வே வாழ்க

புதிய உலகைக் காண -நீ
புவியில் உதித்த நாளே..
ஒளிரும் உலகைக் காண- நீ
வெளியில் குதித்த நாளே..

இதயம் இரண்டும் மகிழ- உன்
உதயம் நிகழ்ந்த நாளே...
இன்பம் எங்கும் பெருக- நீ
இறங்கி வந்த நாளே...

இனிய பிறந்தநாளே - இது
இனிய பிறந்தநாளே
இனிமை மிகுந்த நாளே- இது
இறைவன் கொடுத்த நாளே...

வாழ்க வாழ்க வாழ்க வாழ்க நீ
நீண்ட காலம் வாழ்க
வாழ்க வாழ்க வாழ்க வாழ்க நீ
நீண்ட காலம் வாழ்க

ஆலம் விழுது போலே- நீ
ஆழம் ஊன்ற வாழ்க
ஞான வேதம் போலே-நீ
ஞாலம் ஆள வாழ்க

அன்பும் அறமும் சேர்ந்த- நற்
பண்பைப் போற்றி வாழ்க
தன்மை மேலும் உயர-நம்
தமிழைப் போற்றி வாழ்க

செ. இராசா

மெட்டு: கந்தன் இருக்கும் இடம்----இயக்குநர் திரு. பேரரசு

 

(இன்றைய தினம் இயக்குநர் திரு. பேரரசு அவர்களுடன் நடந்த ஒரு பேட்டியில் நம் நண்பர் மற்றும் திரைப்படப் பாடகர் திரு. இன்பக்கலில் அவர்களின் இனிய குரலில் அடியேனின் வரிகளில் திடீரென்று ஒரு பாடல் ஏற்றி பாடப்பட்டது)

பல்லவி
அண்ணன் எடுத்தபடம் செம்ம ஓட்டம்
அது போலமைஞ்சா சேருமுங்க நல்ல கூட்டம்....(2)

அண்ணன் தந்த பாட்டுயெல்லாம்
செம்ம ஹிட்டுங்க...அது
தலதளபதி இரண்டுபேர்க்கும்
செம்ம பிட்டுங்க...

(இப்பவுந்தான் எடுக்குறாங்க கழுதையாட்டம்- அட
மனசுக்குள்ள உண்மையில
ஒருவித வாட்டம்)

அப்பா சாமி....நீ கொஞ்சம் வாநீ
அண்ணன்போல காமி...இல்லையினா போநீ...
 

சரணம்
செண்டிமண்டு ஆக்க்ஷன்
படம் திருப்பாச்சி பாரு
அடுத்தபடம் சிவகாசி
அதுக்கு ஈடு ஏது?!

தளபதிக்கு இரண்டுதந்து
தலைக்கும் செஞ்சார் ஒன்னு
திருப்பதியத் தேடிப்பாரு
திருப்பவரும் கண்ணு

தர்மபுரி படம் கொடுத்த
தங்கமான மனுசன்டா
பழனி படம் கொடுத்த
பத்தரமாத்துத் தங்கம்டா
திருத்தணி படம் கொடுத்த
தெய்வம்போல மனசுடா
திருவண்ணாமலை எடுத்த
அண்ணன் நம்ம உறவுடா

சீமைப் பிள்ளைடா
சிவகங்கை சீமைப் புள்ளடா
டஃப் கொடுக்கத்தான்
இவன் பொறந்திருக்கான்டா
நேர்மையாக பேட்டிதரும்
இவரைப் போல ஆளிருக்கா
நைனா சொல்லு நைனா

செ.‌இராசா

அதே ஆறு'தான்
ஆனால் புதிய நீர்

குறள் அந்தாதி---இருக்கின்ற நேரம் இருபத்தி நான்கை

இருக்கின்ற நேரம் இருபத்தி நான்கைச்
சரியாய் வகுப்போன் தலை!
(1)

தலைமைப் பணியில் தனித்துவம் தோன்ற
கலையாய்ப் பணியைக் கருது!
(2)

கருதிய யாவையும் கைகூட வேண்டின்
செருக்கின்றி எப்போதும் செய்!
(3)

செய்கின்ற செய்கையை சிந்தையில் ஒட்டிப்பின்
செய்கின்ற செய்கை சிறப்பு
(4)

சிறப்பெனச் சொல்லி சிறுநகை பூத்தால்
உறவுகள் கூடும் உணர்
(5)

உணராமல் பேசும் உரையை விடவும்
உணர்ந்தபின் மௌனம் உயர்வு
(6)

உயர்வான எண்ணம் உயர்த்துவது திண்ணம்
முயன்றால் கிடைக்கும் முடிவு
(7)

முடிவை எதிர்நோக்கி முன்னேறிச் செல்லத்
துடிப்புடன் வேண்டும் துணிவு
(8)

துணிவைத் துணையாக்கி சோராமல் சென்றால்
பணியும் மலைகூடப் பார்
(9)

பார்க்க இயலா பதவிக்குச் சென்றாலும்
யார்க்கும் எளிதாய் இரு
(10)

செ. இராசா

இரவிலோர் ஆட்டம்

 இரவிலோர் ஆட்டம்
......இசைவிலோர் மூட்டம்
பரவிடும் நாட்டம்
.......பரிசாய்ச்- சிரம்காட்டும்
மீண்டுமோர் ஓட்டம்
.......விழிக்கும் வினைக்கூட்டம்
நீண்டிடும் வாட்டம்
........நிதம்!

செ. இராசா

வினைவிதி

 

வினைகளைக் களையவே
.......விளைந்தவர்* மீண்டும்
வினைகளுள் சுழல்வது
.......வினைவலி அன்றோ?
வினைவலி குறையவே
.......விழைபவர்* கூட
வினைகளைப் பெருக்கியே
.......விழுகிறார் அன்றோ?!

வினைகளை ஒதுக்கிட
......முடிவதும் இல்லை!
வினைவலி தடுத்திட
.......முயல்வதும் இல்லை!
வினைவழி கடக்கையில்
......விளைந்திடும் தொல்லை
வினைவிதி புரிந்தவர்
......வினைகளில் இல்லை!

செ. இராசா

*விளைந்தவர்- பிறந்தவர்
*விழைபவர்- விரும்பியவ

நல்லூர் கந்தசாமிக்கான பாடல்

தொகையறா

சங்கத்தமிழ் கண்டத் தமிழனை
பொங்கும்கடல் கொண்டப் பொழுதினில்
வந்துக்கரம் தந்தத் தலைமகன்
….........................வடிவேலன்!
எங்கும்தமிழ்ச் சங்கம் பரவிட
எங்கள்குலம் எங்கும் உலவிட
குன்றில்உயர் குன்றில் உறைபவன்
..........................கதிர்காமன்!
பண்டைத்தமிழ் பண்ணில் இசைந்திட
அண்டைக்குலம் எல்லாம் அசந்திட
இன்றைக்கருள் செய்யக் குமரனைத்
............. .......தொழுவோமே!
கொச்சைத்தமிழ் எங்கும் களைந்திட
இச்சைக்குணம் இல்லா தொழிந்திட
அச்சன்குரு அன்புச் சரவணன்
....................அருள்வோனே!
....................அருள்வோனே!
............,.......அருள்வா..னே!
 

பல்லவி
ஆண்டாண்டு காலமாக ஆளுகின்ற சாமி... ஆளுகின்ற சாமி..
ஆலயத்தைத் தேடிவாறோம் ஆதரவா வாநீ...ஆதரவா வாநீ...

நல்லூரில் நாயகனா வாழுமெங்க சாமி....எங்ககந்த சாமி..
நாதியற்ற நம்மசனம் வாழவழி காமி
....வாழிவழி காமி..

கந்தனுக்கு அரோகரோ
முருகனுக்கு அரோகரோ
வேலனுக்கு அரோகரா
அழகனுக்கு அரோகரோ

வேல்முருகா வெற்றி வேல்முருகா ஓம்
வேல்முருகா வீர வேல்முருகா
 

சரணம் 1

கோடிநெஞ்சில் குடிகொண்ட
......... எங்கள் சண்முகா
நாடிவந்தோர் குறைதீர்க்கும்
...........ஆதி நாயகா
வேண்டிடுவோர் பிணிநீக்கும்
...........எங்கள் வேலவா
மீண்டிடவோர் வரம்வேண்டும்
..........ஞான பண்டிதா
ஞாலமெல்லாம் அருள்செய்யும்
...........எங்கள் குருபரா
ஞானமில்லார் மனம்மாற்றும்
..........ஞால பாலகா
காலமெல்லாம் புகழ்ஓங்கும்
..........சூர வேலவா
ஆசையில்லா நிலையின்றி
..........எம்மைக் காக்கவா

(வேல்முருகா...)
 

சரணம் 2

பழனியில் ஆண்டியான பாலகனே!
செந்தூரில் வென்றகிரு பாகரனே!
பரங்குன்றில் தெய்வயானை கொண்டவனே!
குருவாகி சுவாமிமலை நின்றவனே!
திருத்தணியில் வள்ளியினை ஏற்றவனே!
பழமுதிர்ச் சோலைவாழும் ஆண்டவனே!
எங்கள் நல்லூரை ஆளுகின்ற வேலவனே...
உங்கள் நல்லாசி வேண்டுகின்றோம் ஆண்டவனே...

(வேல்முருகா...)

அரோகரா... அரோகரா.... அரோகரா

செ. இராசா

நீலம்

முதன்மை நிறங்களில்
முக்கிய நிறமெனினும்;
நீலத்தை மட்டும்
மூன்றாம் நிறமென்பது
முற்றிலும் நிற அரசியலே...
(RGB)

எத்தனை நிறங்கள்
இங்கே இருந்தாலும்;
நீலத்தைமட்டும் சேர்த்து
நீலத் திரைப்படமென்பது
ஆபாசம்தரும் அருவெறுப்பே...

ஒன்று தெரியுமா?!

ஒவ்வொரு கோளுக்கும்
ஒவ்வொரு நிறமிருக்க
பூமிக்கு மட்டும்தான்
நீலநிறக் கோளென்ற
சிறப்புப் பெயர்!

இவ்வளவு ஏன்?
நீலவண்ணக் கண்ணாவென்றும்
நீலகண்டப் பெருமானென்றும்
கடவுள்களில்கூட நிறபேதமில்லை...
ஆனால்..
இந்த மனிதர்களில்தான்...
இன்னும்..
நீல மென்றால் அது பேதம்...

அட..
தேசியக்கொடியின் சக்கரம்கூட
நீல நிறம்தான்
ஆனால்...
கட்சிக்கொடிகளில் வரும் நீலம்தான்
கண்களை உறுத்துகிறது...

நீங்கள் என்னதான் கூறினாலும்
நீல வைரம் தான் மதிப்புமிக்கது...
நீலத் திமிங்கலம்தான் மிகப்பெரியது
நீல வானம்தான் மிக உயர்ந்தது
நீலக் கடல்தான் மிகப் பரந்தது...
ஆம்..
நீலம் நிரந்தரம்;
நீல நிறம் தரம்!

ஆயினும்...
நீலத்தைக் குறியீடாக்கி
சாதியத்தை பேசுவது
பா'ர்க்க ரஞ்சிதமாய் இல்லை!
போதும் பிரம்மாக்களே...
நிற அரசியலை விடுங்கள்...!!!
நிஜ அரசியலைத் தொடுங்கள்...!!!

செ. இராசா

நீயே என் பிரபஞ்சமடா...

 

நீ
கண்சிமிட்டும் போதெல்லாம்
எம் இதய வானிலே இடி மின்னல்...

நீ
புன்னகைக்கும் போதெல்லாம்
எம் உயிரை வருடும் இளந்தென்றல்..

நீ
உதடுகடிக்கும் போதெல்லாம்
என் உடலை நனைக்கும் மழைத்தூறல்..

நீ
மீசை தடவும் போதல்லாம்
என் ஆசை நதியில் பெருவெள்ளம்..

நீ
நெருங்கி வரும் போதெல்லாம்
நான் உன்னில் கரையும் ஓர் துளி..

ஆம்..
நீ...
நீ..
நீயே என் பிரபஞ்சமடா...

செ. இராசா

(இன்று இணையத்தில் ஓர் தலைப்பு பார்த்தேன். அந்தத் தலைப்பு #நீயே_என்_உலகமடா...அத்தலைப்பை சற்றே மாற்றி எழுதியுள்ளேன்)

அறுவடை காலம்

பொறுக்கின்ற காலம் பொறுத்திருந்தால் வாய்க்கும்
அறுவடை காலம் அறுப்பு

பத்தோடு பதினொன்னா

பத்தோடு பதினொன்னா வாழாதே- நீ
கெத்தோடு திமிறாம ஓடாதே!
இத்தோடு முடிவென்று பேசாதே- நீ
எத்தோடும் இணையாக்கி நோகாதே ...

எழுதாத கவிதைகளை எழுத வேண்டும்

 

எழுதாத கவிதைகளை எழுத வேண்டும்!

.....எழுதும்முன் மனதையது வருட வேண்டும்!

அழுகாத வருங்காலம் தோன்ற வேண்டும்!

.....அழுகும்முன் வருங்கவலைத் தீர வேண்டும்!

நழுவாத உறவுகளை நாட வேண்டும்!

.....நழுவும்முன் நகர்ந்துவிட எண்ண வேண்டும்!

முழுவாதத் திறன்பெருக பயில வேண்டும்!

...முழுவாழ்க்கை முடியும்முன் வாழ வேண்டும்!

 

செ. இராசா