முரண்களின் மொத்த உருவம் நாம்

குளிர் காலத்தில் வெயில்தேடிடும் நாம்தான்
கோடை காலத்தில் கொடைக்கானல் போகிறோம்!

வாரக் கடைசியில் ஓய்வுதேடிடும் நாம்தான்
வேலை இல்லையேல் வெறுத்துப் போகிறோம்!

இளமைப் பருவத்தில் இதயம்தேடிடும் நாம்தான்
இணைந்த பின்னரே சலித்துப் போகிறோம்!

தொலைவில் இருக்கையில் வியந்துபேசிடும் நாம்தான்
தொட்டுப் பார்க்கையில் விட்டுப் போகிறோம்!

கவிதை செய்கையில் கடவுளாகிடும் நாம்தான்
கற்பனை நிற்கையில் காணாமல் போகிறோம்!

ஆம்

#முரண்களின்_மொத்த_உருவம்_நாம்