நடமாடும் தெய்வம்

தும்மினால் துடித்து
விம்மினால் துடைத்து
கம்மியாய் ஊடிடும் உருவம்- எந்தன்
கண்ணில் நடமாடும் தெய்வம்!

அல்லதை விடுத்து
நல்லதை எடுத்து
உள்ளதை உரைக்கும் உருவம்- எந்தன்
உள்ளத்தில் உறவாடும் தெய்வம்!

உயிரில் நுழைந்து
உயிர்-மை கலந்து
தாய்மையைக் கொடுக்கும் உருவம்- எந்தன்
தாய்மெய் தெரிகின்ற தெய்வம்!

கருவம் குறைந்து
கருணை மிகுந்து
கவிபோல் பொழியும் உருவம்- இந்தப்
புவிமேல் அவன்தான் தெய்வம்!

✍️செ. இராசா