சாதிய நாக்கினைத் தொங்கவிட்டு

சொந்த மக்களைக் கொன்றுவிட்டு- நீ
எந்த சாதியை வளர்க்கின்றாய்?!
பந்த பாசத்தைக் கொன்றுவிட்டு- நீ
எந்த பாதையில் போகின்றாய்?!!

சாதியச் சேற்றை பூசிக்கொண்டு- ஏன்
சாக்கடைப் பன்றிபோல் திரிகின்றாய்!
சாதிய நாக்கினைத் தொங்கவிட்டு- ஏன்
சாக்காட்டு நாய்போல் அலைகின்றாய்!

சரித்திரத் தலைவர்கள் அனைவரையும்- ஏன்
சாதியத் தலைவராய் மாற்றிவிட்டாய்!
சிலைகளின் கழுத்திலே மாலையிட்டு- ஏன்
சாதியால் வயிற்றை வளர்க்கின்றாய்?

போதும் போதும் இளைஞர்களே- நாம்
பொறுத்தது போதும் இளைஞர்களே!
இனியும் இங்கே பொறுத்திருந்தால்- நாம்
இழப்பது அதிகம் இளைஞர்களே!

ஆரியம் புகுத்திய சாதியினை- இந்த
திராவிடர் வளர்த்ததை மறவாதீர்!
ஓட்டு அரசியல் செய்வதற்கு- இவர்
காட்டிடும் நாடகம் நம்பாதீர்!

ஆள்பவர் சரியாய் இருந்திருந்தால்- இந்த
ஆணவக் கொலைகள் தொடர்ந்திடுமா!
அன்றே சாதியை ஒழித்திருந்தால்- நாம்
இன்றையக் கொடுமையைக் காண்போமா?!

போதும் போதும் இளைஞர்களே- நாம்
பொறுத்தது போதும் இளைஞர்களே!
இனியும் இங்கே பொறுத்திருந்தால்- நாம்
இழப்பது அதிகம் இளைஞர்களே!