சாமிக்குள் சாதி

ஒரு ஊரின் நடுவினிலே
கண்ணன் சாமி கோவில்!
கண்ணன் சாமி ஆட்டம் பார்க்க
ஒரே பக்தி கூட்டம்!

கழுத்தெல்லாம் மாலைகளாய்
ஒவ்வொன்றாக வீழும்!
குழந்தைகளும் குமரிகளும்
கன்னங்களில் போடும்!

அதே ஊரின் மறுதிசையில்
முனி சாமி கோவில்!
அந்த சாமி ஆட்டம்பார்க்க
அங்கும் ஓரு கூட்டம்!

முக்தியேறி போன முனி
ஊரச் சுத்தி வருது..
காலில் விழும் அனைவருக்கும்
ஆசிகளைத் தருது...

ஆடிவந்த முனிசாமி
கண்ணன்சாமியப் பார்க்க...
கண்களிலே பேசியதும்
கரங்கள் நான்கும் கோர்க்க....

இதைப்பார்த்த ஒரு மனுசன்
குய்யோ...முறையோன்னு கத்த....
என்னவென்று விளங்கவில்லை
சிறுவர்களுக்கு மட்டும்...

சாமிகளில் சாதியென்றும்
சாதிபார்க்கும் சாமியென்றும்
எதுவுமில்லை மக்கா...
எங்குமில்லை மக்கா...