(தமிழ் இலக்கணம்-2)

அசை என்றால் என்ன?
*****************************
ஒவ்வொரு பாடலில் வரும் அடிகளும் சீர்களால் ஆனது. ஒவ்வொரு சீரும் அசைகளால் ஆனது. அசை சரியாக வரும் பாடலே நல்ல இசையாக மாறும்.

சீர்களில் மொத்தம் எத்தனை வகைகள் உள்ளன?
***************************************************************
சீர்களில் மொத்தம் நான்கு வகைகள் உள்ளன.

அவையாவன...

1. ஓரசைச்சீர் (2 வகைகள்)
2. ஈரசைச்சீர் (4 வகைகள்)
3. மூவசைச்சீர் (8 வகைகள்)
4. நாலசைச்சீர் (16 வகைகள்)

ஓரசைச்சீர் பற்றி விளக்குக?
***********************************
ஒரே அசையோடு வரும் சீர் ஓரசைச்சீர் ஆகும். அவற்றில் நேர், நிரை என்ற இரண்டு அசைகளில் ஏதேனும் ஒரு அசையோடு வரும்.

வாய்ப்பாடு:

நேர்---நாள்
நிரை- மலர்

உதாரணம்: (இதுவே அடிப்படை)

க, கா, கல், கால்------நேர்
கல, கலா, கலம், கலாம்-----நிரை

ஈரசைச்சீர் பற்றி விளக்குக?
***********************************
இரண்டு அசைகளின் கூட்டாக வரும் சீர் ஈரசைச்சீராகும். அவை நான்கு வகைப்படும். (மாச்சீர்-2 + விளச்சீர்-2)

நேர் நேர்------தே மா
நிரை நேர்-----புளி மா
நேர் நிரை-----கூ விளம்
நிரை நிரை----கரு விளம்

(பழ மாங்காய், புளித்த ஊறுகாய் மாங்காய், வில்வ மரம், விளா மரம் என்ற ரீதியில் வைத்துள்ளார்கள்)

மூவசைச்சீர் பற்றி விளக்குக?
***************************************
ஈரசைச்சீருடன் நேர் சேர்க்க நான்கு சீர்களும், நிரை சேர்க்க நான்கு சீர்களும் மொத்தம் எட்டு சீர்கள் வருகின்றன. நேர் சேர்க்க வருவது காய்ச்சீர் என்றும் , நிரை சேர்க்க வருவது கனிச்சீர் என்றும் அழைக்கப்படுகிறது. (காய்ச்சீர்-4 + கனிச்சீர்-4)

நேர் நேர் நேர்- -------தேமாங்காய்
நிரை நேர் நேர்-------புளிமாங்காய்
நேர் நிரை நேர்-------கூவிளங்காய்
நிரை நிரை நேர்-----கருவிளங்காய்

நேர் நேர் நிரை- -------தேமாங்கனி
நிரை நேர் நிரை-------புளிமாங்கனி
நேர் நிரை நிரை-------கூவிளங்கனி
நிரை நிரை நிரை-----கருவிளங்கனி

நாலசைச்சீர் பற்றி விளக்குக?
*****************************************
எப்போதாவதுதான் நாலசைச்சீர் வருகிறது. இருப்பினும் இதையும் தெரிந்து கொள்வோம். மூவசைச்சீருடன் நேர் சேர்க்க எட்டு சீர்களும், நிரை சேர்க்க எட்டு சீர்களும் மொத்தம் பதினாறு சீர்கள் வருகின்றன. நேர் சேர்க்க வருவது பூச்சீர் என்றும், நிரை சேர்க்க வருவது நிழற்சீர் என்றும் அழைக்கப்படுகிறது. (பூச்சீர்-8 + நிழற்சீர்-8)

நேர் நேர் நேர் நேர்-- -------தேமாந்தண்பூ
நிரை நேர் நேர் நேர்--------புளிமாந்தண்பூ
நேர் நிரை நேர் நேர்--------கூவிளந்தண்பூ
நிரை நிரை நேர் நேர்------கருவிளந்தண்பூ

நேர் நேர் நிரை நேர்-- -------தேமாநறும்பூ
நிரை நேர் நிரை நேர்--------புளிமாநறும்பூ
நேர் நிரை நிரை நேர்--------கூவிளநறும்பூ
நிரை நிரை நிரை நேர்-----கருவிளநறும்பூ

நேர் நேர் நேர் நிரை-- -------தேமாந்தண்ணிழல்
நிரை நேர் நேர் நிரை--------புளிமாந்தண்ணிழல்
நேர் நிரை நேர் நிரை-------கூவிளந்தண்ணிழல்
நிரை நிரை நேர் நிரை------கருவிளந்தண்ணிழல்

நேர் நேர் நிரை நிரை-- -------தேமாநறுநிழல்
நிரை நேர் நிரை நிரை--------புளிமாநறுநிழல்
நேர் நிரை நிரை நிரை--------கூவிளநறுநிழல்
நிரை நிரை நிரை நிரை-----கருவிளநறுநிழல்

(தண்பூ-4 , நறும்பூ -4 , தண்ணிழல்-4 , நறுநிழல் -4 )

செ-இராசா---